Ombudsmandi: Aalisarsinnaanermut akuerineqarnissamut qinnuteqaaterpassuit suliarineqaqqittariaqarput

Aalisarnermut Naalakkersuisoqarfiup aqutsiveqarfimmi 47-mi, Qeqertarsuup Tunuani, qaleralinniarnissamut akuersissutinik qinnuteqaatit ukiup ataatsip sinnerlugu ingerlanerani suliaralugillu itigartitsissutigisarsimavai. Tamannalu inatsisitigut tunngaveqarani pisarsimavoq.

Ombudsmani Naalakkersuisut piffissami pineqartumi inatsisitigut tunngaveqaratik suliaqartarsimanerannik isorartorsiuisoq taamatut inerniliivoq.

Innuttaasup ataatsip 2020-mi aggustip qaammataani qaleralinniarnissamut akuersissummik itigartinneqarsimasup naammagittaalliuutaa tunngavigalugu ombudsmandip suliaq misissorsimavaa.

Isorisariallit arlaqartut

- Naalakkersuisut inatsimmilu pisariaqarneratut tunngavissaqaratik Qeqertarsuup Tunuani aqutsiveqarfimmi 47-mi umiatsiaararsorluni sinerissamut qanittumi aalisarsinnaanermut akuersissutinik nutaanik qinnuteqaateqartunut nutaanut tunniussisarnermik sumi najugaqarneq tunngavigalugu unitsitsiniarlutik 15. november 2019-imi ingerlaannartumik sunniuteqalersumik aalajangernerat isorisarialittut isigaara, ombudsmandi allappoq.

Ombudsmandip aamma Naalakkersuisut sumi najugaqarnissamik piumasaqaat tunngavigalugu aqutsiveqarfimmi umiatsiaararsortunut akuersissutinik tunniussisarnerup ingerlaannartumik atorunnaarsinneqarnissaanik aalajangersimanerat kiisalu qinnuteqaammut aalajangersimasumut ombudsmandimut naammagittaalliuutigineqarsimasumut atatillugu suliassat suliarineqartarnerat pillugu inatsimmi piumasaqaatinik naammassinnissimannginnerat isornartorsiorpai.

Suliaq naatsumik

Grønlandsbankenimit 2019-ip naanerani nalunaarutigineqarpoq, qaleralinniartarneq pitsaanerusumik aqunneqanngippat ”aalisarnermi aningaasaqarnerup ajalusoornissaa” ernummatigalugu.

Taamatut nalunaaruteqarmat kattuffiit politikkerillu piumasaqaateqalerput, tamatumalu malitsigisaanik taamanikkut Naalakkersuisuusut aalajangerput, 2022-mi apriilip qaammataata tungaanut aqutsiveqarfik 47-mi, Qeqetarsuup Tunuani, aalisartunut nutaanut akuersissutinik tunniussisarneq unitsinneqassasoq.

Piffissami pineqartumi Jens Immanuelsen susassaqarfimmut Naalakkersuisuuvoq.

Taamanikkulli aalajangiineq inatsisitigut tunngavissaqanngilaq, aatsaallu 2021-mi januaarip aallaqqaataani qaleralinniartarneq pillugu nalunaarut, aqutsiveqarfimmi aalisartunut nutaanut akuersissutinik tunniussisarnermik unitsitsisussaq atuutsinneqalerluni.

Qinnuteqaataasimasut misissorneqassasut

Ombudsmandip inerniliinermini naalakkersuisoqarfimmut innersuussutigaa qinnuteqaateqartarneq atuutseqqinneqalissasoq. Tamatuma saniatigut naalakkersuisoqarfimmut innersuussutigaa, aqutsiveqarfik 47-mi, Qeqertarsuup Tunuani, umiatsiaararsorlutik aalisartut aalisarsinnaanermut akuersissutinik qinnuteqaatigisimasaat nalilersoqqinneqassasut.

- Aammattaaq inassutigaara aqutsiveqarfimmi 47-mi umiatsiaararsorluni aalisarsinnaanermut akuersissutinik qinnuteqaatit piffissami 15. november 2019-imit Naalakkersuisut akuersissutinik tunniussisarnermik unitsitsiniarlutik aalajangerfiannit 1. januar 2021-p, qalerallit pillugit nalunaarutip atuutilerfiata tungaanut, tiguneqarsimasut tamaasa suliareqqissagai, ombudsmandi allappoq.

Ombudsmandimit naalakkersuisoqarfik piumaffigineqarsimavoq, innersuussutit malillugit naalakkersuisoqarfiup qanoq iliuuseqarniarnini ombudsmandimut nalunaarutigeqqullugu.