qinersineq

Olsvip uranimik paatsiveerunnera isorinnittut saassuppaat

Sara Olsvigip aatsitassanik qaqutigoortumik - tamatumani ilanngullugu uranimik - piiaanissamik innuttaasut taasitinneqarnissaannik tamatumalu qanoq pineqarnissaanik Sara Olsvigip oqaaseqaatai pissutigalugit maanna Siumup SIK-llu Inuit Ataqatigiit siulittaasuat saassuppaat

Karen Motzfeldt, Siumut tunuliaqutaralugu Inatsisartunut qinigassanngortittoq

Inuit Ataqatigiit siulittaasuat Sara Olsvig isornartorsiorneqalerpoq, Politiken-ip arfininngormat allaaserisaq ´Grønladnsk toppolitiker vil blæse på resultatet af en folkeafstemning´ saqqummiutereeraalu.

Allaaserisami allassimavoq Inuit Ataqatigiit ´piumasarigaat aatsitassarsiornermi urani pillugu innuttaasut taasitinneqarnissaat. Taassumali inernera qanorluunniit issagaluarpat IA-p piiaaffiit annersaat mattunniarpaa - GME-p Kuannersuarni piiaaffia´.

Allaaserisami uissuumminartumi Siumut tunuliaqutaralugu Inatsisartunut qinigassanngortittup Julie Rademacherip Greenland Minerals and Energyllu pisortaanerata John Mairip Inuit Ataqatigiit siulittaasuat sakkortuumik saassuppaat.

Allaaserisap saqqummiunneqarnerata kingorna Sar Olsvig imminut illersorniarluni ilaatigut Sermitsiaq.AG-mut oqarpoq:

– Uagut (Inuit Ataqatigiit, aaqqiss.) kissaatigaarput urani stoffillu allat radiop qinngorneranik ulorianartunik akullit pillugit nuna tramakkerlugu innuttaasunik taasisitsisoqassasoq. Aallaavigaarput akuersaanngilluinnarnermi killissatut naligititaq,t assa 60 PPM. Naluneqanngitsutut tamatumuunakkut aatsitassanik annertuumik suli piiaasoqarsinnaaswsaaq.

Siumut saassusseqqippoq

Sara Olsvigilli kingorna nassuiaatai Siumup SIK-luunniit eqqississutiginngilaat, Olsvig oqaraluartoq urani pillugu innuttaasunik taasisitsiniarneq aamma Kuannersuarni piiaaffimmik suliniummut akerliuneq assigiinngissuteqartut, tassa Kuannersuarnut suliniummut atatillugu ersissutigigamiuk Narsap eqqaani inuussutissarsiutit pioreersut innarlerneqarnissaat.

– Manna tikillugu IA-p aammalu Sara Olsvigip oqaatigisaraluarpaat innuttaasunik taasititsisoqassasoq aatsitassarsiornermi qinngornernik ulorianartunik akulinnik atuisoqassanersoq, taasinerullu inernera takussutissaassasoq aatsitassarsiornermi aatsitassanik qinngornernik ulorianartunik akulinnik saniatigooralugu piiaasoqarsinnaanera. Ilisimaneqartutuut taamatut siunnersuuteqarnertik iluarinngikkaluaqaat, kisiannili innuttaasut tusaajumasaat aallaavigaat, Karen Motzfeldt, Siumumit Inatsisartunut qinigassanngortittoq, oqaaseqaammini oqarpoq.

Itisilerivorlu:

– Qineqqusaarnerup naalerluinnarnerani nunattalu aningaasaqarnera ataatsimut isigitillugu – Sara Olsvig IA-kkunniit siunnersuuteqaleriallartoq aatsitassarsiornermi aaqqissuussineq allanngorluinnartariaqartoq. Nunaminertakkaartuminngooq aaqqissuussineq eqqutissaaq. Avammut oqariartorneq soorlulusooq suli paatsuuganartunngortinneruniarlugu, Sara Olsvig IA-meersoq oqaleriallartoq Kuannersuarnigooq aatsitassarsiorneq aallartittoqarsinnaanera akerleralugu – allaanngooq innuttaasut taasinermikkut aatsitassaq qinngornernik ulorianartunik akoqalaartoq saniatigooralugu piiaavigineqartussanngornera akuersaaraluarpassuk , Karen Motzfeldt siullermeersumik Inatsisartunut qinigassanngortittoq oqarpoq.

SIK: Sara Olsvig oqqat marluk atorlugit oqaluppoq

SIK-p siulittaasuata Jess G. Berthelsenip Inuit Ataqatigiit siulittaasuat oqqat marluk atorlugit oqalunnerarlugu isornartorsiorpaa.

– Aatsitassanik qaqutigoortunik (uranitalinnik) piiaasoqarsinnaaneq pillugu inuiaqatigiit kalaallit saallugit Inuit Ataqatigiit siulittaasuat Sara Olsvig oqariartuuteqarpoq taasisitsisoqassasoq. Tassa kikkut tamat oqartussaaqataanerat naapertorlugu ima paasivarput, inuiaqatigiit oqariartuutaat, tassa taasinerup inernera, ataqqineqassasoq, taamalu inuiaqatigiit aaliangernerat tunngavigalugu aatsitassarsiornerup tungaatigut nunatsinni ingerlassalluta, Jess G. Berthelsen tikkuaavoq.

– Kisianni ajoraluartumik tassa paasivarput Inuit Ataqatigiit siulittaasuat Sara Olsvig illuanut Danskinut saakkami allatut kiinnerluni oqariartuuteqarpoq, tusagassaqartitsivik Politiken-imi apersorneqarami oqarluni urani pillugu inuiaqatigiit taasisinneqaraluarpataluunniit so-qutiginnginnerarlugu. Tassa aaliangiusimassavaa aatsitassanik qaqutigoortut uranitaqarpata aatsitassarsiortoqanngivissasoq. SIK-mi isumaqarpugut taamatut oqqat marluk atorlugit kiinnertaaseqarluni politikeritut sulineq inuiaqatigiinnut mitalliinerusoq, isumaqarpugullu kikkut tamat oqartussaaqataa-nerat innarlerneqartoq, SIK-p siulittaasua oqarpoq.

Powered by Labrador CMS