Olsvig: Suleriaaseq Tunngaviusumik inatsimmut naapertuutinngilaq

Kalaallit Nunaata nunanut allanut sillimaniarnermullu politikki pineqartillugu oqaaseqarsinnaatitaanera ukiorpassuarni oqallisigineqarsimavoq. Tunnaviusumik inatsit naapertorlugu Kalaallit Nunaannit susassaqarfinni marlunni taakkunani nammineerluni iliuuseqarsinnaatitaanngilaq.

Tunngaviusumilli inatsit Namminersornermullu inatsit imminnut naapertuutinngillat, piviusullu takutippaa Kalaallit Nunaat nunanut allanut sillimaniarnermullu politikkikkut suliassaqarfinni sunniuteqartartoq, Sara Olsvig Ilisimatusarfimmi PhD-mik suliaqartoq inerniliivoq.

Taassuma Dansk Institut for Internationale Studierimi ilisimatusartut pisortaat Ulrik Pram Gad suleqatigalugu misissueqqissaarsimanermini ajornartorsiut allaaserisimavaa. Misissueqqissaarsimaneq Issittumi sillimaniarnermut politikkki pillugu atuakkiami nutaami ilaatinneqarpoq.

Naalagaaffiit kisimik isiginiarneqartartut

Olsvigip oqaatigaa, Kalaallit Nunaata sunniuteqarsinnaanera pingaaruteqartuusoq:

- Nunarsuarmi naalagaaffiit pissaanilissuit pissaaneqarniukkaluttuinnarput naalagaaffillu imminnut qanoq iliuuseqarfigineqartarnerat kisimi isiginiarneqartarluni.

- Amerikamiullu nunanut allanut ministeriata Anthony Blinkenip ministeritut angalanermi siulliit ilaanni Kalaallit Nunaannukarnissani aalajangermagu oqaluttuaq allarluinnaavoq, Sara Olsvig oqarpoq.

Olsvigip oqaatiginiagaa tassaavoq, USA-mit tikeraartoqarneratigut Kalaallit Nunaat pingaartinneqartoq, naak tamanna Tunngaviusumik inatsimmi allassimanngikkaluartoq.

Sinaakkutit pissusiviusunut naapertuutinngitsut

Sara Olsvigip oqaatigaa, Kalaallit Nunaata iliuuseqartarneratigut inatsisitigut sinaakkusiussat Kalaallit Nunaat EF-iusimasumit animmalli avaqqunneqartarsimasu:

- Danmarki 1973-imi EF-imut ilanngummat Kalaallit Nunaat ilannguteqataavoq, Kalaallilli Nunaat Namminersornerullutik Oqartussat atuutilermata EF-imit anisimalluni. Sinaakkusiussat ilaat naapertuuttuaannanngikkaluartut, Kalaallit Nunaanni inoqarpoq nunanut tamalaanut pingaaruteqartumik aalajangiisartunik.

- Kalaallit Nunaat nunani tamalaani akuulerlunilu suliaqartalersimavoq, Sara Olsvig oqarpoq.

Assersuutigineqarsinnaasoq alla tassaavoq, Ilulissani, Nuummi Qaqortumilu timmisartoqarfiliornissap akuersissutigineqarsimanera. Timmisartoqarfiliorniarnerit Inatsisartut kisimik ilusilersorlugillu akuersissutigaat, taamaakkaluartoq Danmarkimit qisuariartoqarpoq, timmisartoqarfiliorniarnerimmi Kangerlussuarmut Illersornissaqarfimmit atorneqartartumut kinguneqartussaammata.

Nammineq aalajangiisinnaassuseqarneq tunuartinneqarsinnaasoq

- Taamatut pisoqaraangat Namminersornermut inatsisip Tunngaviusumillu inatsisip akornanni naapertuukkunnaartoqartarpoq. Danmarkip Tunngaviusumik inatsit innersuussutigalugu Inatsisartuni aalajangiisoqarneranut peqataatinneqartarnissani piumasarisarsinnaavaa, Kalaallillu Nunaanni nunamut namminermut poligikkitut isigisarsinnaavaa? Sillimaniarnermullu politikki pineqartillugu Kalaallit Nunaat Namminersornermut inatsit innersuussutigalugu qanoq nammineq aalajangiisinnaassuseqartigiva?

- Inerniliussarput tassaavoq, naalagaaffeqatigiinni Kalaallillu Nunaanni namminermi aalajangiisarnissamut aaqqissuussat, Kalaallit Nunaata ullumikkut pisarnermisut aalajangiissuteqarnissaanut naapertuutinngitsut. Taamaammat Kalaallit Nunaata nunanut allanut sillimaniarnermullu politikkikkut aalajangiisinnaassuseqarnera nukittorsarneqartariaqarpoq, Sara Olsvig oqarpoq, nangillunilu:

- Aamma sillimaniarnermut politikkip nunamullu namminermut poligikkip akornanni erseqqissumik killiliisoqarsinnaannginnera oqaatigaarput. Taamaammat naalagaaffeqatigiinni politikkip ineriartortinneqartarnera eqqarsaatigalugu allatut eqqarsartoqartariaqarpoq, taamaanngippammi Kalaallit Nunaata Namminersornermut inatsit aqqutigalugu nammineq aalajangiisinnaassuseqarnera atorunnaasinneqarsinnaavoq.