Olsvig: Kielsenip naliliisinnaassuseqannginnera
Benziinamut akiliut pillugu suliami illuatungiliuttut tatiginnikkunnaarnermik taasititsiniarnerannut Kim Kielsenip pakatsissuteqarneranut, IA-p siulittaasua Sara Olsvig akissuteqarpoq, tamatuma kinguneranik Doris J. Jensen pingasunngormat naalakkersuisutut tunuarpoq.
- Naalakkeersuisut siulittaasuata Kim Kielsenip Naalakkersuisup tunuarnerata kingorna illuatungiliuttut qisuariaatigisaannut pakatsinerminik oqariartornermini ersarilluinnartumik naliliisinnaassutsimigullu qanoq inissisimini takutippaa, tamannalu ajusaarnaraluartumik Kim Kielsenip aqutseriaasianut ilisarnaatinngorsimasutut taasariaqarluni. Kim Kielsenip pakatsissutigisussaagaluarpaa politikerertaqarattaasit nammineq Nunattalu Karsiata aningaasaataannik immikkoortitsisinnanngitsumik, Sara Olsvig tusagassiuutinut nalunaarummi allappoq.
Qularuteqanngitsut Doris J. Jensenip benziinamut akiliutaata atornerlunneqarnera nalinginnaasuunngitsoq qularutigineqanngilluinnarsimasoq, Sara Olsvigip naqissuserpaa.
- Inuit Ataqatigiunngilaq suliaq sivitsorsarlugu sulisimasut aamma uaguunngilaq taamani Naalakkersooqatigiiusimasuni naammaginanngitsumik nipangersimasussaatitaanermillu meqqilersukkamik paasissutissiisimasut innuuttaasunut paasissutissiisinnaannginnermik kingunilimmik. Kim Kielsen-illiuna aalajagingaa soorlu aamma Kim Kielsenip aalajagingarigaa marloriarluni Doris J. Jensen Naalakkersuisunngortissallugu naak nalunngikkaluarlugu atornerluinermik suliamik Inatsisartut Kukkunersiuinermut Ataatsimiititaliaanit Nunatta Karsianut Naatsorsuutit 2017-moortut suliarineqalerpata oqaaseqateqartussanngulernerani tatiginnikkunnaarnermik taasititsisoqarsinnaaneranik kinguneqariaannaasumik sulisoqartoqariaannaasoq, Sara Olsvig allappoq.
Paasissutissat toqqorterneqartut
Illuatungiliuttut paragraf 37 naapertorlugu akissut aamma Deloittep nalunaarusiaa suliamut atatillugu saqqummiunneqartup qisuariarfigineratigut suliassartik suliarisimagaa, IA-mi siulittaasoq isumaqarpoq.
- Taamani Naalakkersuisuusimasunut paasissutissiissutigineqartut Deloittep nalunaarutaatut imartutiginngillat. Ilimagisimavarput suliaq taamatut imaqariaannaasoq kisianni Kukkunersiuinermut Ataatsimiititalip suliaat sakkortusisamik nipangersimasussaatitaanermik piumasaqaatitaqarmata imarisaanut tunngatillugu paasitinneqarsinnaasimanngilagut, Sara Olsvig ilisimatitsivoq, Deloittep nalunaarusiaata imarisaata partiip Doris J. Jensenip naalakkersuisutut tatigisassaajunnaarneranut aallaaviusut taanna naqissusiivoq.
Naliliisinnaaneq aamma ataqqinninneq
- Kim Kielseni 2017-imili taamatut naliliisinnaasimagaluarpoq. Naliisinnaassuseqarnermut piginnaassusikinneq innuttaasullu tatiginninnerannik ataqqinninnginneq pissutaaqataavoq Inuit Ataqatigiit Siumumik naalakkersuisooqateqaleqqikkusunngikkallarnitsinnut, Sara Olsvig oqarpoq.
- lluatungiliuttut pakatsissutiginagit nammineq iliuutsini pakatsissutigissagaluarpai. Maanna inernerilerpaa inuiaqatigiinni akisussaaffiit akisunerpaat annertunerpaallu Naalakkersuisut akunnerminni agguaateqqittussanngormatigit tamannaluaasit innuttaasut inuiaqatigiillu aningaasartuutissaat annertussaqaaq, Sara Olsvig naqissusiivoq, imatullu naggasiilluni:
- Tamanna naammaginanngilluinnarpoq.