valg
Olsvigip assani Kielsenimut isaappai: Uku suleqatigiiffigisinnaavagut
Inuit Ataqatigiit Siumumik suleqatigiiffigisinnaasatik tallimat TV-kkut qineqqusaarnermi saqqummiuppai. Suleqatigiiffigineqarsinnaasutut taakkartorneqartut tallimat takukkit
Qinersisoqangajalernera ilutigalugu ulapittoqarpoq. KNR-TV-kkut qineqqusaartitsineq ’Head to Head’ kingulleq ingerlanneqarpoq ataasinngormat.
Inuit Ataqatigiinni siulittaasoq Sara Olsvig aamma Siumup siulittaasua Kim Kielsen illugiitillugit qineqqusaartinneqarput.
Sara Olsvigip Siumullu suleqatigiissutigisinnaasatik saqqummiuppai. Sara Olsvigip qaqitai tallimat tassaapput:
Ineriartortinneqarsinnaasut naapeqatigiiffiginissaat
Meeqqat inuusuttullu atugaannik pitsanngorsaanissaq
Kalaallit Nunaat siammasissumik ineriartussaaq - illoqarfiit sisamat kisimik ineriartortinneqassanngillat
Naligiinnerulernissaq anguneqassaaq aaqqissuusseqqinnikkut
Oqaloqatigiissinnaanerusariaqarpugut
Qinersinerup kingorna suleqatigiinnissaq
Qinersereernerup kingorna Inuit Ataqatigiit suleqatigilerneqarnissaa neriuutigalugu Siumup siulittaasua Kim Kielsen Sermitsiaq.AG-mut oqarpoq.
- IA-p suleqatiginnikkusunnera nuannaarutigaara. Suleqatigiinnissarput Nunatsinnut pisariaqarpoq. Suleqatigiinnerusariaqarpugut immitsinnut ungasilliartuinnarnata, Kim Kielsen oqarpoq.
- Kisianni partiiviugut assigiinngitsut. Politikkikkut Siumut IA-lu assigiinngitsorujussuusut takusinnaavara. Akileraartarnermi aamma uranitalinnik piiaanissamut politikkimi partiinut allanut Siumut qaninneruvoq, Kim Kielsen oqarpoq.
- Isumaqatigiissutaasinnaasunik naaperiaasinnaasariaqarpugulli siammasissumik aalajangiisoqarnissaa anguniarlugu. Nunanit allaneersut aningaasaliinianut tamanna patajaatsumik politikkeqarneq takutinneqassaaq. Aningaasaliinissat Kalaallit Nunaata aningaasaqarneranut pingaaruteqassapput. Taamaattumik qinersisoqareerpat neriuutigaara isumaqatigiiffigisinnaasatsinnik nassaartalernissaput, Kim Kielsen Sermitsiaq.AG-mut oqarpoq.