Olsvig: Ataatsimiititaliaq Danmarkimit pisariaqartinneqarpoq

Naalagaaffeqatigiinni attaveqaqatigeeriaatsit pisoqalisimapput, ataatsmiititaliarlu nutaaq siunissami aalajangiissuteqartarnissami Kalaallit Nunaata peqataatinneqarnerunissaata qulakkeerneqarnissaanut eqqortumik alloriarneruvoq.

Taamatut naliliivoq ph.d.-nngorniartoq IA-milu siusinnerusukkut siulittaasuusoq Sara Olsvig.

Ulluni kingullerni naalagaaffeqatigiit ataatsimeeqatigiinneranni Danmarkip Kalaallit Nunaannut taamatut nassueruteqarnera taassuma tupaallaatiginngilaa.

Nassueruteqartoqarneratigut Kalaallit Nunaat Issittumi Siunnersuisoqatigiit ataatsimiinneranni Danmarkimutt Savalimmiunullu siuttunngoqqitsinneqarpoq. Tamatuma saniatigut ataatsimiiittaliaq attaveqaataasussaq pilersinneqarpoq, sillimaniarnermut illersornissamullu tunngassuteqartunik suliaqartartussaq, aamma tassani Kalaallit Nunaat Savalimmiullu "oqaasissaqartinneqarnerussapput", ministeriuneq Mette Frederiksen sisamanngormat ualikkut oqarpoq.

Kalaallit Nunaat naatsorsuutiginngisamik oqaasissaqartinneqarnerulersoq

- Tamanna tupaallaatigivallaanngilara. Nutaanik nunanut allanut sillimaniarnermullu tunngassuteqartunik eqqummaarinnerorpasittunik aamma naalagaaffiit pissaanilissuit pisaaneqarniunneranni Kalaallit Nunaata pingaaruteqassuanik eqqummaarinnerorpasittunik Naalakkersusoqalernikuuvugut, Sara Olsvig oqarpoq.

Kalaallit Nunaata Issittumi Siunnersuisoqatigiit ataatsimiinneranni sallersanngortinneqarnissaanik aalajangerimaneq pingaaruteqartorujussuartut Olsvigip oqaatigaa.

- Ukiuni kingullerni qulini Kalaallit Nunaata siunnersuisoqatigiinni inissisimanini attakkuminaatsissimavaa, Issittumi Siunnersuisoqatigiit siusinnerusumut sanilliullugu naalagaaffiit oqallittarfiattut atorneqarnerulersimammat, siusinnerusukkummi inuiaat akunnerminni suleqatigiiffigisaraluarpaat, Kalaallit Nunaat aamma siusinnerusukkut naalagaaffeqatigiit sinnerlugit isumaqatigiissutinik atsiortarsimavoq.

- Kalaallilli Nunaat maanna sunniuteqarnerusinnaanngorpoq, Issittumimi pissanganartorsiortoqarneruleriartortoqarnerani Kalaallit Nunaata taamatut inissisimalernissaa ilimagineqarsimanngimmat, maannali Kalaallit Nunaata nunat assigiinngitsut imminnut sunniiveqatigiittarneranni inissisimanini pissutigalugu amma nammineq aalajangiisinnaassuseqaleriartornermini sunniuteqarnerulersinnaanngorpoq, Sara Olsvig Sermitsiaq.AG-mut oqarpoq.

Piginnaasanik annertusaaniarneq attaveqaqatigiittarnerup pisoqalisimaneranut assersuutaasoq

Taassuma ataatsimiititaliaq attaveqaataasussaq pillugu oqaatigaa, tamanna Danmarkimit 'pisariaqartinneqartoq', Danmarkimmi nunanut allanut sillimaniarnermullu politikkikkut aalajangiisoqartussaatillugu Kalaallit Nunaat eqqarsaatiginerusariaqaramiuk.

- Kalaallit Nunaat isornartorsiuinerulersimavoq, aammali Danmarkimut pingaaruteqarnerulersimalluni, taanna oqarpoq.

Naalagaaffeqatigiit ataatsimeeqatigiinnissaat sioqqullugu, Kalaallit Nunaanni savalimmiunilu illersornissamik nukittorsaaniarnermi 1,5 milliarder koruunit nalingannik Issittumi piginnaasanik annertusaaniarneq pillugu folketingimi aalajangiisoqarsimanera oqallisigineqarsimaqaaq.

Sara Olsvigip taamatut aalajangertoqarsimanera, naalagaaffeqatigiinni attaveqaqatigeeriatsip pisoqalisimaneranut assersuutaasutut oqaatigaa, Danmarkimiimmi nunatsinni inatsisartut peqataatinngagit Kalaallit Nunaannut tunngassuteqartunik aalajangiisoqartarsimagami.

Inatsisartuni ataatsimiititaliaq oqaasissaqarnerusariaqartoq

Danmarkimit suliaq pillugu Naalakkersuisuusimasut isumasiorneqarsimapput, Naalakkersuisulli Inatsisartunik peqataatitsisimanngillat.

Taamaammat ataatsimiititaliaq attaveqaataasussaq ajunngitsumik aallariarneruvoq, aammali Kalaallit Nunaanni allannguisoqartariaqarluni, taanna oqarpoq.

Danmarkimi ilisimatooq Ulrik Gad peqatigalugu naalagaaffeqatigiinni pitsaanerusumik attaveqatigiittarnissamut inassuteqaatitalimmik decembarip qaammataani allakkiaminnik saqqummiussisimapput.

Inassuteqaatit ilagaat, Inatsisartut Nunanut allanut Sillimaniarnermullu Ataatsimiititaliaat nukittorsarneqartariaqartoq:

- Inassuteqaatigisimavarput, ataatsimiititaliap Folketingimi Nunannut allanut ataatsimiititaliaatulli nukittutigilersinneqartariaqartoq.

- Tunngaviusumik inatsit malillugu Danmarkimi naalakkersuisut ataatsimiititaliamik siunersiuisartussaapput. Naalakkersuisut ullumikkut pissussaafiginngilaat Nunanut allanut Sillimaniarnermullu Ataatsimiititaliamik peqataatitsisarnissaq, tamannalu Kalaallit Nunaata sanngeeqqutigivaa, Sara Olsvig oqarpoq.