Nalunaarut nutaaq
Olsvig: Namminersulivinnissamik isuma qaminneqanngilaq
Inuit Ataqatigiit sinnerlugit Folketingimi ilaasortap Sara Olsvigip nalunaarut nutaaq ’Kalaallit Nunaannut iluaqutaasussaq’ iluarisimaarpaa
Sara Olsvig Inuit Ataqatigiit sinnerlugit Folketingimi Inatsisartunilu ilaasortaq isumaqarpoq nunatsinni aatsitassanik isumalluuteqarneq pillugu nalunaarut pillugu oqarpoq, namminersulivinnissamik isuma nalunaarutip ipisinngikkaa. – Nalunaarutip takutiinnarpaa inuussutissarsiutitigut inerisaanermi periarfissanut allanut tappinnerusariaqartugut, Olsvig Sermitsiaq.AG-mut oqarpoq.
Atuaruk: Ilisimatuut: Namminiilivinniarneq siunissami ungasinnerusumiippoq
Nalunaarusiami nutaami qulequtaqartumi ’Kalaallit Nunaannut iluaqutaasussaq’mi tallimanngornermi tamanut saqqummiunneqartumi allaqqavoq aningaasarsiornikkut Nunatta imminut napatilernissaanut aatsitassat kisimik isumalluutaasinnaanngitsut. Danmarkimi tusagassiorfiit arlallit allapput namminersulivinnissamik isuma ipitinneqartoq.
Atuaruk: Tapiissutit atorfissaqartinneqartuaannassapput
Qallunaat tusagassiorfii isumaqatiginngilai
- Qallunaat tusagassiorfiisa inerniliinerat isumaqatiginngilara. Nalunaarusialli inerniliinera tassaasoq aatsitassat kisimik isumalluutigineqarsinnaanngitsut isumaqatigaara, Sara Olsvig nalunaarusiamik atuarsimasoq oqarpoq.
Atuaruk: Aleqa nalunaarut pillugu qisuariarpoq
Taanna isumaqarpoq nalunaarusiap imarisai arlallit ilisimaneqareersut.
Atuaruk: Paasisimasalik: Nalunaarusiaq avissaartuutsitsisinnaavoq
- Akileraartarnermut Atugarissaarnermullu isumalioqatigiissiat aamma aningaasarsiornermut sinnersuisooqatigiit siusinnerusukkut oqaatigisareerpaat aatsitassat kisimik isumalluutaasinnaanngitsut aningaasarsiornikkut imminut napatilissagutta. Taamaattoq nalunaarusiaq naammagisimaarluarpara iliuuserineqarsinnaasunik arlalinnik ersarissunik innersuussimmat siunissaq pillugu oqallinnermi atorneqarsinnaalluartunik Sara Olsvig oqarpoq.
Inuiaqatigiit oqallinnerat
Taanna aamma isumaqarpoq nalunaarusiaq ’Kalaallit Nunaannut iluaqutaasussaq’ inuussutissarsiutit pillugit oqalliseqqinnissamut tunngaviliilluartoq.
- Inuiaqatigiinni oqallinneq tamanit peqataaffigineqartoq amigaatigaarput. Isumaqarpunga maanna piffissanngortoq nunap assingani tikkuartuinissamut sumiiffiit sorliit aatsitassarsiornermik ingerlatsiviussanersut sumiiffiillu sorliit inuussutissarsiutinik allanik ingerlatsiviussanersut, Sara Olsvig oqarpoq.
Nalunaarusiaq ’Kalaallit Nunaannut iluaqutaasussaq’ Nuummi Ilimmarfimmi saqqummiunneqassaaq oqallinnertalimmik. Ilisimatusartut arlaliusut nalunaarusiaq suliaraat.
Nalunaarusiaq pillugu annerusumik atuarsinnaavutit Sermitsiami tallimanngornermi saqqummersumi tassanilu nalunaarusiortut siulittaasuat Minik Rosing Ilimmarfimmi siulersuisuni aamma siulittaasuusoq isumaliutersuummik allaaserisaqarpoq. Linki ataaniittoq atorlugu Sermitsiaq nutaaq aasinnaavat.