Skip to main content

Olsvig malittarisassat nutaat pillugit: Akiuussutissalertissimanissamut misissortinnissamullu piumasaqaatit ingasaanneqanngillat

Neriniartarfimmukarnissaq imerniartarfimmukarnissarluunniit inuunermut pingaaruteqanngillat, aamma malittarisassat nutaat ulloq atorunnaarfissaat erseqqissumik saqqummiunneqarsimapput. Taamaammat killilersuutit nutaat inuit pisinnaatitaaffiinik unioqqutitsinerunngillat, Inuit pisinnaatitaaffii pillugit Siunnersuisoqatigiinni siulittaasoq isumaqarpoq.

Arfininngorninngorluni unnuap-qeqqartoq nunami maani coronamut atatillugu malittarisassat nutaat arlallit atuutilerput. Sumiiffiit ilaannut isissagaanni tamakkiisumik akiuussutissalertissimanermut uppernarsaammik imaluunniit coronamik tunillatsissimannginnermut uppernarsaammik nalunaaquttap akunnerinik 48-nik pisoqaassusilimmik takutseqqaartarnissaq taakkunani pineqarluni.

Sermitsiaq.AG-p Inuit Pisinnaatitaaffii pillugi Siunnersuisoqatigiit malittarisassat nutaat inuit pisinnaatitaaffiinut atatillugit qanoq isigineraat aperisimavaat.

Inuit Pisinnaatitaaffii pillugit Siunnersuisoqatigiinni siulittaasup Sara Olsvigip oqaatigaa, malittarisassat ataatsimut isigalugit naammaginartuusut - tassa Nunatsinni coronap tuniluunnera eqqarsaatigalugu pissutsinut tunngatillugit ingasanngillat.

- Aappaatigut inuit inuunerat illersorneqartussaavoq - peqqissuunissaat eqqarsaatigalugu - tamatumunngali peqatigitillugu inuit tunngaviusumik pisinnaatitaaffii, soorlu  illeqanngitsumik angalasinnaatitaanerisa katersuussinnaatitaanerisalu sapinngisamik annikinnerpaamik killiliiffigineqarnissaat qulakkeerneqartussaavoq. 

- Malittarisassat atuutsinneqalersut ingasattutut inuiluunniit pisinnaatitaaffiinik unioqqutitsisutut isiginngilavut, unammillernartortaqarpulli, Sara Olsvig oqarpoq.

Ullormik atorunnaarfissaliisimaneq nersualaarneqartoq

Olsvigip erseqqissaassutigaa, Inuit Pisinnaatitaaffii pillugi Siunnersuisoqatigiit aamma Institut for Menneskerettighederip coronap nunarsuarmi tuniluutilerneqaranut atatillugu suliamik ilisimasalinnut allakkiaritissimasaat tunngavigalugu taamatut oqaaseqarluni.

Oqartussat malittarisassanik nutaanik ullormik atorunnaarfissaliisimanerat nersualaarpaa, nalunaarutit marluk killilersuutinik imallit aggustip qulingani atorunnaartussatut aalajangiunneqarsimammata. Malittarisassat inuit pisinnaatitaaffiinik killiisut pineqartillugit ullormik atorunnaarfissaliisimaneq pingaaruteqarpoq:

- Killilersuutit annertuut peqqissuunissaq eqqarsaatigalugu pisariaarutinneqarniariartut atorunnaarsinneqartussaapput. Ullormik atorunnaarfissaliisimaneq eqqarsaatigalugu oqartussat killiliinissamik isumaginnissimanerattut isigaarput, eqqarsaatigilluakkamillu killiliisimasutut isigalugit, Sara Olsvig oqarpoq, nangillunilu:

- Tamatigut oqimaaqatigiissitsiniartoqartarpoq, aamma akisussaasutut politikkerit oqartussallu inuunermik illersuiniarnermik saniatigut inuit pisinnaatitaaffiisa killilerneqannginnissaat anguniarlugu suliaqartarnerat oqitsuinnaasanngilaq.

Misissortinniartunik assigiimmik pinnittarnissaq

Olsvigip unammillernartut ilaattut erseqqissaassutigaa, coronamut misissortiniartunik assigiimmik pinnittarnissamik oqartussat eqqumaffiginninniartussaanerat.

Sapaatip akunnerata kingulliup aallartinnerani Sermitsiaq.AG-mit oqaluttuarineqarpoq, assersuutigalugu Tasiusami misissuinissamut naammattunik atortussaqartoqanngitsoq, tassa misissortikkusuttunik tamanik misissuisoqarnissaanut naammattunik atortussaqanngitsoq.

- Nunami sumi najugaqarneq apeqqutaalluni, kikkut tamarmik misissortissinnaanngillat. Tamanna sulissutigineqartariaqarpoq. Tamanna nalinginnaasunngorsimappat, atortussat iluamik inissinneqartariaqarput - pisariaqanngitsumik inuit assigiinngitsumik pineqassanngippata, Sara Olsvig oqarpoq.

Oqartussalli nunami tamarmi akiuussutissaqartoqarnissaanik iliuuseqarsimanerat nersualaarpaa.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER