Olsen Kids EP-mik saqqummersitsivoq

Olsen Kids, erinarsuutinik meerarsiutinik inuusuttorsiutinillu saqqummersitsisarsimasut, EP-mik 1. august saqqummersitsipput. EP ateqarpoq "Oqaluttuaq Naavoq".

- Erinnat allaanerujussuupput. Inersimasunngorsimanerput tassani malunnarpoq, erinnammi inersimasuunermut inuunermullu tunngasuupput, Ikiuna Kristiansen Olsen Sermitsiaq,AG-mut oqaluttuarpoq.

Olsen Kidsimi erinarsortuupput Ikiuna K. Olsen, Kuutak aamma Ivaana Kristiansen Olsen. Olsen Kids siullermik CD-mik saqqummersitsipput atserlugu ”Anika-mut” 2001-imi. CD 5.000-nngorlugu tunineqarluni. 2009-p tungaanut CD-nik katillugit tallimanik saqqummersitsisimapput, ataataatalu Peter Olsenip, maanna ilaatigut kulturimut ilinniartitaanermullu Naalakkersuisuusup, erinarsuutit taalliaralugillu erinalersorsimavai.

Peter Olsen aamma maanna taalliortuullunilu erinniortuuvoq.

- Ataatarput peroriartornitsinni malinnaajuarsimavoq, taalliornermillu soqutigisaqartuugami aamma saqqummersitsinissatsinnut taalliortarsimavoq erinniortarlunilu. Taama angorusutaqartigisimanngitsuuppat maanna immaqa saqqummersitsisimanavianngikkaluarpugut. Soorunami uagut piumanerput apeqqutaalluni, maanna saqqummersitsivugut, Ikiuna Kristiansen Olsen oqaluttuarpoq.

Tusarnaartartut peroriartoqatigalugit

Erinarsoqatigiit atiat maanna allanngortinnagu saqqummersitseqqikkaluartut, taamaattoq ukiut 20-t matuma siorna saqqummersitseqqaarnermit, maanna erinarsuutit allaanerujussuusut, Ikiuna Kristiansen Olsen oqaluttuarpoq. Erinarsuutit saqqummersut inuusuttunut samminerupput, inuunermut inersimasuunermullu tunnganerullutik.

- Saqqummersitsisarnigut peroriartornitsinnut malinnaasimapput. Maannakkut taava inissaminiippoq inersimasunngornitsinni inuuneq nalunngisarput aallaavigalugu aamma saqqummersitsinissarput, 33-nik ukiulik Ikiuna Kristiansen Olsen oqarpoq.

Taassumalli naatsorsuutiginngilaa erinnanik albuminilluunniit siunissami saqqummersitseqqissallutik.

- Inersimasunngornikuuvugut allanillu nuannarisatsinnik suliaqalernikuulluta. Nukarlersarput Ivaana K. Olsen aamma nammineq saqqummersitsinikuuvoq. Inuunitsinni allanik soqutigisaqalernikuuvugut, inissisimanerpullu nuannaraarput, oqaluttuarpoq.

Tusarnaartitsinissamut pilersaaruteqanngilaq

- Imaassinnaasoq tusarnaartartunut pakatsinalaarsinnaasoq, kisianni tusarnaartitsisaqattaarnissamik maannakkuugallartumut pilersaaruteqanngilagut. Naluarput siunissaq qanoq ikkumaarnersoq, maannakkulli saqqummersitatta qanoq ingerlanissaa takoqqaassuarput. Tassa naammassisutut ippugut, Ikiuna Kristiansen Olsen oqarpoq.

Erinnat saqqummersut tallimat tigulluarneqarsimasut, taanna oqarpoq. Erinnat tusarnaarutini digitaliusuni tamani, soorlu iTunesimi Spotifymilu tusarnaarneqarsinnaapput.