Olsen erseqqissaassuteqartoq: Sakkutuunngorniarnissamut misilitsinerit tapiiffigineqassanngillat
Sakkutuunngorniarnissamut misilitsinnerit danskit akisussaaffigigaat, naalakkersuisup oqaatigaa.
Inatsisartuni kalaallit inuusuttut sakkutuunngorniarnissamut misilitsinnissamut periarfissaat pingasunngornermi sakkortuumik oqallisigineqarpoq.
Tassunga atatillug Sermitsiaq.AG-mit ilinniartitaanermut naalakkersuisoq Peter Olsen (IA) oqarsimatinneqarpoq, sakkutuunngorniarnermut misilitsinnerit allatut ilinniagaqarnermut atatillugu pissappata tapiissuteqarfigineqarsinnaasut.
Tamannali kukkuneruvoq. Peter Olsenip tapiissuteqartoqassanngitsoq erseqqissaassutigaa, tamanna danskit akisussaaffiattut isigineqarmat:
- Apeqqarissaartoqarnerani sakkutuunngorniarnissamut misilitsinnermut tapiissuteqartoqarsinnaasoq oqaatigisimanngilara. Sakkutuunngorniarnissamut misilitsinnerit danskit akisussaaffigivaat, tamannalu aamma allanut atatillugu oqaatigisareernikuuara, Peter Olsen allappoq.
Pineqartoq politikkikkut sammineqarsimaqaaq, ilaatigut partiinit illuatungiliuttunit nunami maani sakkutuujusussaanermut misilitsittarnissamut Illersornissaqarfiup pilersaarutai Naalakkersuisunit taamaatiinnarneqarsimanerat naammagineqanngilluinnarmat. Tamatuma kingornatigut nunami maani inuusuttut misilitsikkiartorlutik Danmarkimukarnissamut Namminersorlutik Oqartussanit tapiiffigineqarsinnaanersut paatsuungassutigineqarsimavoq.
Sermitsiaq.AG-p kukkusimaneq ajuusaarutigaa.