Skip to main content

Oline påskep sapaataani naalagiartitsisaqattaangaatsiassaaq

Danmarkimi palasi kalaaleq, Oline Berthelsen, påskemi ulapingaatsiassaaq. Naalagiartitsivissai takukkit.

- Inuit tamarmik Oqaatsit ilitsoqqussaralugu oqaatsitik atorlugit tusarnissaat pisariaqartittarpaat. Tarnikkut tamanna eqqissinartuuvoq.

Danmarkimi palasi kalaaleq, Oline Berthelsen, Danmarkimi sumiiffinni assigiinngitsuni arfinilinni påskep sapaataanni naalagiartitsisussaq, taama oqarpoq.

- Danmarkimi kalaallisut naalagiartitsinerit ornigarneqarluartarput. Peqataasut aggertarput Guutip oqaasii kalaallisut tusarusullguit – kalaallisullu tussiutit meeraanerminniilli ilitsoqqussatik atorusullugit, palasi oqarpoq. Taassuma aamma maluginiarsimavaa qallunaat arlaqartut kalaallisut naalagiariartortartut.

Oline Berthelsen Danmarkimi ukiut tallimat matuma siorna palasitut atorfeqalerami aperineqarsimavoq kalaallit qallunaanit uppernerunersut.

Oqaluffik tamanut atugassaavoq

- Tamanna akisinnaasimanngilara, upperisaqarnermi assigiinngitsorpassuarnik kiinaqarpoq, assigiinngitsorpassuartigut atorneqarluni, ataatsimulli isigigaanni allaanerussuteqangaanngilaq. Oqaluffik tamanut atugassaavoq – uppertunut aammalu uppertuunngitsunut, Oline Berthelsen oqarpoq erseqqissarlugulu Danmarkimi kalaallisut naalagiarnerit kalaallinut kisimi atugassiaanngitsut:

- Kalaallisut naalagiartitsinerni qallunaat arlallit aamma peqataasarput. Immaqa Kalaallit Nunaanniinnikuusimapput, immaqa kalaallinik ilaqutaqarput, naalagiarnermi tiguartinnartuuvoq amerlasuunit pingaartinneqartoq.

Qallunaat aqquserngi 30.000 kilometerit

Påske juullilu Oline Berthelsenimut suliffiungaatsiartarput, taassumammi Danmark tamakkerlugu sullivigaa. Ukiut tamaasa Danmarkimi 30.000 kilometerit angallavigisarpai.

- Naalagiartoqareeraangat inuit eqqissinerusarput. Tamanna takusinnaallugulu tusaasinnaasarpara, taamaammat isorartuumut angalanissara ajoriffissaqartinngilara. Danmarkip Kalaallit Nunaatalu assigiinngissusaanni anginerpaaq, påskep nalaani Oline Berthelsenip misigisarpaa.

- Påskelernerani Kalaallit Nunaanni pingasunngornikkut naalagiartitsisoqartarpoq. Danmarkimi tamanna atorneqanngitsoq maluginiarpara, maqaasisarlugulu.

Den grønlandske præst i Danmark, Oline Berthelsen, kører årligt 30.000 km.
Jesper Hansen

Oline Berthelsen påskemut naalagiartitsinerit sapaatip akunnerata naanerani kingullermili aallartippai, Esbjergimi naalagiartitsigami. Kingorna Aarhusimi Vor Frue Kirkemi ileqquusoq malillugu Palmit sapaataanni naalagiartitsivoq. Vor Frue Kirkemi ukiut 57-ssaat Palmit sapaataanni kalaallisut naalagiartitsisoqarpoq. Vor Frue Kirkemilu Oline Berthelsen atorfeqartinneqarpoq.

Oqaluffeqarnermut ministeria akiliisarpoq

Qallunaat oqaluffeqarnermut ministeriaata Oline Berthelsenip akissarsiai akilertarpaat. Vor Frue Kirkemi atorfeqartutut allaqqavoq, kisiannili Aalborgimi angerlarsimaffimmini sulinerusarluni.

Oline Berthelsen Danmarkimi palasitut 2014-imi atorfinippoq, taassumallu siuliani Sisimiuni ukiuni 14-ini palasiusimalluni. Taanna soraarninngorsimagaluarpoq, periarfissarli takkummat misileerusussimalluni.

- Kalaallit peqatigiiffii, peqatigiiffiillu kattuffiat Inuit peqatigalugit naalagiartitsinerit ataqatigiissartarpakka, taamaammat oqartoqarsinnaavoq peqatigiiffiit tassaasut “ilagiit sinniisui”, palasi nassuiaavoq.

Ileqquusut malillugit sapaassuarni sapaatinilu naalagiartitsinerit saniatigut Oline Berthelsen, Danmarkimi kalaallit najugaqartut kuisitsinerini, katinnerini ilisinerinilu periarfissaqartilluni naalagiartitsisarpoq.

Danmarkimi kalaallisut naalagiartitsinissat:

  • Sisamanngorneq Illernartoq 18. april kl. 13.00: Skivemi Vor Frue Kirke 
  • Tallimanngorneq Tannaartoq 19. april kl. 13.00: Odensemi Thomas Kingos Kirke
  • Påskemi 21. april kl. 13.00: Aalborgimi Hans Egedes Kirke
  • Påskep ulluisa aappaanni 22. april kl. 13.00: Nykøbing Falsterimi Lindeskovkirken
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER