Skip to main content

Ole Dorph ullumikkut siunnersuumminut akerliuvoq

Ole Dorphip (S) ullumikkut suliffiit 86-t Nuummiit Paamiunut nuukkusuppai, naak 1013-imi ersarilluinnartumik atorfiit amerlasuut illuatungaanut nuunneqarnissaat tunngavilersuiffiginikuugaluarlugu

Isumamik pigisaqartoqartarpoq, nutaamik isumataarnissap tungaanut. Qallunaat politikkianni ajoqersuut ukiorpassuarni taanna atorneqartarpoq.

Tamannalu aamma Qaasuitsup Kommuniani borgmesterimut, Ole Dorphimut atuuppoq.

Tassami borgmesteri ukiut pingasut ingerlaneranni mumippoq, atorfiillu Nuummut imaluunniit Nuummit nuunneqarnissaanut apeqqummi isummani allanngortilluinnarpaa.

Paamiunit peerusuttoq
Borgmesteri januaarimi 2013-imi, taamanikkut aamma Paamiuni Imarsiornermik Ilinniarfimmi siulittaasuusoq, ilinniarfik Nuummut nuunneqarnissaanik innersuussuteqarpoq.

Atuaruk: Siumup nuutsitsinissamik siunnersuut taperserpaa

Taassuma ilinniarfimmilu siulersuisut sinnerisa isumaqatigiissutigaat, Imarsiornermik Ilinniarfik Nuummut nuunneqaruni iluaqutissartaqarnerusoq.

– Nuummi ilinniartitaanermut avatangiisit pitsasuullutillu allanngorartuupput, taamaalillunilu imarsiornermik ilinniartut periarfissaqalissapput ilinniarnerminni uummarissarneqarnissaminnik kiisalu ilinniartut allat peqatigalugit inooqataanissaminnut. Aammali ilinniartut ilinniarfeqarfinni uniinnartarnerisa pinaveersimatinnissaanut suliniarnissamut peqataatinneqassaaq, Ole Dorph allappoq, isumaqarnerarlunilu Paamiuniit Nuummut nuussinikkut ilinniartunut iluaqutissat amerlanerussasut.

Allaaserisaq 2013-imeersoq atuaruk: Ilinniarfiup nuunneqarnissaa pillugu oqallinneq illuinnaasiortoq

Taassuma saniatigut ilinniartut amerliartornissaanut naatsorsuutiginninnerup ilinniarfik illoqarfimmut annermut sooq nuussanersoq, Dorphi allanik sisamanik tunngavilersuuteqarpoq.

Nuummi pitsaanerussasoq
Ilinniarfiup siulittaasuata naatsorsuutigisimavaa aningaasat pissarsissutaalluarnerussasut, ilinniarfiup allaffissornertaa aamma siunnersuinertaa ataqatigiinnerulissasoq, ilinniartitsisunullu aamma  ilinniartut piareerneranni amerlanerusunik suiffissaqartitsisussanik suliffeqarfinnik qaninnerusumik suleqateqarneq.

Oqallinneq - taamanikkut aamma akerleriiffiusoq - ilinniarfiup pingasunut avinneqarneranik kinguneqarpoq, tunngaviusumik ilinniarneq Paamiuniiginnarluni, qullersaqarfia aammalu aqumiutut ilinniarfik Nuummut nuunneqarpoq, aalisarnermut piniarnermullu ilinniarfik Uummannamut nuunneqarluni.

Maanna suliffiit amerlanerusut
Sapaatip-akunnerani kingullermi Ole Dorphip borgmesterit Siumumeersut marluk, Jørgen Wæver Johansen aamma Hermann Berthelsen, peqatigalugit assinganik siunnersuuteqarput, tassa Imarsiornermik Ilinniarfimmi atorfiit 15-it Paamiunut uterteqqiinnarnagit, aamma atorfiit Nukissiorfiit qullersaqarfianit aamma Royal Arctic Linemit 71-it nuunneqaqquaat.

Borgmesterit nalunaarusiaat uani atuaruk

Wæver Johansenip nuussuinissaq illersorpaa: Nunarput aningaasanik sipaaruteqassaaq

Sermitsiaq.AG-p marlunngornermi Ole Dorphip oqariartuutai allanngorartut pillugit oqaloqatigaa.

2013-imi oqaatigisatit peqqissimissutigaagit?

- Naamik, peqqissimissutiginngilakka. Ilinniarfimmut maanna qinnuteqarluartoqartarpoq, taamanikkullu Paamiuniikkallarmat qinnuteqartut amerlavallaarneq ajorput.

Kamannermik pilersitsisoq
Nuummi politikerit nutaanerit ilaat, najukkami Demokraatini siulittaasup, Rasmus Dalsgaard Andersenip, Siumumi politikerip isumaanik allanngorartumik aperineqarami tupigusuppoq.

- Ole Dorphip aallaqqaammut tunngavilersuutaa isumaqatigilluinnarpara, kisianni arlaannik pissuteqarluni maanna killormoortuanik isumaqalertoq paasisariaqarparput, Rasmus Dalsgaard Andersen oqarpoq.

Atuaruk: Evaldsenip siunnersuut tapersinngilaa: Sipaarpugut

Dorphi ilinniarfimmi siulittaasuusimasutut ersarinnerusumik nassuiaasariaqartoq, taanna isumaqarpoq.

- Naapertuutinngitsunik isummersorneranik nassuiaanissaanut kajumissaartariaqarparput. Tamanna innuttaasunut aamma minnerunngitsumik Imarsiornermik Ilinniarfimmi sulisunut ilinniartunullu ileqqorissaarnerussaaq, Rasmus Dalsgaard Andersen (D) oqarpoq.

NANGISSINEQ: Borgmesterip nutserinissamik siunnersuut amigartoq nassuerutigaa

Siunnersuut: Nuummi suliffiit 600-t ukununnga nuussapput

Suliffiit sinerissamut nuutsinneqartariaqarpat - Qanoq isumaqarpit?

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER