taasititsineq
Ole Dorph: Kommuni avinneqassaaq
Qaasuitsup Kommuniani borgmeterip taasititsisoqarnerani qisuariaataa siulleq
Qaasuitsup Kommuniani borgmesteri Ole Dorph Siumumeersup innuttaasut taasitinneqarnerisa inernerata kingunera ersarittuusoq oqaatigaa.
- Innuttaasut ersarissumik politikkerinut oqariartuuteqarput. Kommuni avinneqassaaq, tikkuussisumik taasititsinermut qisuariaataa siulleq taama nipeqarpoq.
Taasisinnaasuni taaseqataasut Inatsisartunut qinersinernut sanilliullugu annertugisassaanngilaq.
Ilulissat kommunianni taasititsinerup qanoq ingerlasimaneranik nalunaaruteqartoqarnerani tusagassiuutinut ilisimatitsissutigineqarpoq kommunip avinneqarnissaanut isumaqataasut taasisut 79 procentiisa kissaatigigaa.
Kommunip avinneqannginnissaanut kissaateqartut 21 procentiusoq.
Taasititsinissamut paasissutissiineq kingusinaartumik ingerlanneqarsimasoq borgmesteri Ole Dorph kommunalbestyrelsimilu ilaasortat innuttaasut ilaannit isornartorsiorneqarput.
Ole Dorphili tassunga tunngatillugu isumaqataanngilaq.
- Taasititsinissaq pillugu oqallisingaatsiarnikuuvugut. Kommunerujussuaqalermalli kommunimit aaqqissuunneqartareerpoq innuttaasunik ataatsimiititsisoqartarluni. Ajornartorsiut nutaajunngilaq. Kommunerujussuaqalerneraniilli oqallinneq ingerlanikuuvoq. Innuttaasut taasisoqarnissaanut taamaattumik ilisimatinneqarluarsimasut isumaqarpunga, Ole Dorph oqarpoq.
Taasititsinermut tunngasut allaaserineqartut