Skip to main content

OL-eqataanissamut neriunaatilik:: Nukittunerullunga uteqqissaanga

Sisoraaserluni ooqattaasartartoq Ukaleq Slettemark piffissami sivisuumi napparsimareerluni peqqissiartorpoq

Ukaleq Slettemark qaammatini kingullerni napparsimanini pissutigalugu sisoraaserluni ooqattaasarnermi unammeqataasimanngitsoq Sermitsiaq.AG-mit oqaloqatigineqarpoq.

Juullilersoq nuffaserpoq, napparsimanini pissutigalugu inuusuttuaqqat nunarsuarmi pissartanngorniunneranni januaarimi peqataanngitsoorluni.

- Nakorsiaqattaaraluarpunga, suna nappaatigineriga paasineqanngilaq. Arlaleriarlunga nuffasersimanngikkuma, sivisuumik nuassimasinnaavunga. Sungiusaqqilernissannut utaqqisinnaananga sungiusajaarsimasinnaavunga, peqqissivinnanga sungiusarlunga, oqaluttuarpoq. Taanna Dansk Idrætsforbundimit ukioq kingulleq OL-imut peqataasussatut neriunaatilittut toqqarneqarpoq.

Piumassuseerukkaluartoq

Timersortartut napparsimanissamut qaninnerusartut oqaatigaa.

- Napparsimasarnissara naatsorsuutigisariaqarpara. Napparsimalerpunga angalaqattaareerlunga unammeqattaareerlungalu. Napparsimanera maanna taama sivisutiginera allaaqutaavoq, 18-nik ukiulik sisoraaserluni ooqattaasartartoq oqarpoq.

Taama sivisutigisumik unammisinnaannginnini Ukaleq Slettemarkimut eqquivoq.

- Napparsimanerma nalaani nikallungallungalu piumassuseerukkaluarpunga. Taamaattoq upperaara una pisoq pitsaanerulersissinnaagaanga. Tassami periarfissat allat eqqumaffiginerulerpakka, taavalu inuit allat kiisami ilaginerulaarsinnaalerlugit napparsimanerma nalaani. Taamaattoq imminut tusarnaarsinnaaneq pingaartinnerulerpara, aaliangersorneqarusunngilanga qanoq sungiusassanerlunga. Soorunami siunnersuutit tusaaniartassavakka, uangali aalajangernikka pingaartinnerulerpakka, oqaluttuarpoq.

Peqqissipallannissamik eqqarsarneq eqquisoq

Maannali siuariartorluni oqarpoq:

- Arlaleriarlunga eqqarsartaraluarpunga peqqissiliivillunga, taamaattoq napparsimaleqqittarlunga. Maannali siuariartorpunga.

- VM-eqataannginnerit ugguaatigaajuk?

- Ilaannginnama pakatseqaanga, ukiumimi unammiffiusumi VM pingaarnersaavoq. Sungiusarluarnikuugaluarpunga VM-eqataanissara tamaviaarullugu. Angerlaannarnissamik aalajangerneq oqitsuinnaanngilaq. Uannut naatsorsuutit aamma annertupput, taakku sivisuumik napparsimaninnut peqqutaagunarput. Tassami peqqissipallannissara pingaartippallaarsimavara VM-ertoqanngilaataa. Taamaattoq siunissamut suli neriulluarpunga, sulimi inuusoqaanga. Suli angusassaqarluarlunga misigaanga, nukittunerullunga uteqqinnissara qularutiginngilara, Ukaleq Slettemark oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER