Odensemi Kalaallit illuat nutaamik pisortartaalersoq
Nauja Bianco Odensemi Kalaallit Illuanni aamma Nordatlantisk Husimi pisortatut atorfinitsinneqarsimavoq.
44-nik ukiulik Nauja Bianco Kalaallit Nunaanneersoq, Odensemi Kalaallit Illuanni aamma Nordatlantisk Husimi ulloq 11. august 2020 aallarnerfigalugu pisortatut sulilissaaq, taassuma Kirsten Mærsk ukiuni 16-ini pisortaasimalluni ulloq 30. juni 2020 soraarninngorniartoq paarlassavaa.
Illut taakku marluk tusagassiorfinnut nalunaaruteqarnerminni ilisimatitsipput.
Nauja Bianco Nuummi inunngorlunilu alliartorsimavoq, naalagaaffiillu pissusiinik ilisimatusarnermik ilinniagaqarsimalluni. Ilaatigut Namminersorlutik Oqartussani, Danmarkimi Nunanut allanut Ministeeriaqarfimmi aamma Nunani Avannarlerni Ministerit Siunnersuisoqatigiiffianni sulisarsimavoq.
- Ukiut marluk ukiullu affaa ingerlanerani kingullermi Nauja Biancop siunnersortitut namminersortutut suliffeqarfissani pilersissisimavaa, Kalaallillu Nunaannut, Issittumut Atlantikullu avannaanut tunngatillugit ingerlatseriaatsimik inerisaanermik, kulturikkut suleqatigiinnermik paasititsiniaanermillu misilittagaqalersimalluni, tusagassiorfinnut nalunaarummi allassimavoq.
Sulilernissaminut qilanaartoq
Pisortanngortorlu sulilernissaminut qilanaarpoq:
- Piginnaasakka misilittakkakkalu Nordatlantisk Husimi sulinerup atuutereersup ingerlateqqinnissaanut aamma illup siunissami ineriartorteqqinneqarnissaanut atatillugu anguniakkat atuutsinneqalernissaanut atornissaannut qilanaarpunga.
- Nordatlantiske Husi Odensemiittoq Kalaallit Nunaata Atlantikullu avannarliup nittarsaannissaannut tunngavissatsialaavoq. Tamatumunngalu peqataanissannut qilanaarpunga, Nauja Bianco oqarpoq.
Nunarsuarmik paasisimasaqarluartoq najukkamillu ilisimasalik
Kalaallit Illuanni siulittaasoq Benny Nybo, atorfinitsitsineq pillugu oqarpoq:
- Nuannaarutigaara Kalaallit Nunaannut, Atlantikup avannaanut Issittumullu tunngatillugit paaisisimasaqarluartumik, illumilu suliamik pitsaasumik ingerlatisteqqissinnaasumik pisortartaaratta. Nauja nunarsuarmik paasisimasaqarluarlunilu, Atlantikup avannaani Issittumilu najukkani politikkinik, nunat qanoq ittuunerinik inuunermilu atukkanik ilisimasaqarluarpoq.
- Nauja Biancop nunarsuup ilaa taanna pillugu oqaluttuamik pingaarutilimmik qulakkeerinneqataanissaanut aamma nordatlantisk husip ineriartoqqinneqarneranut allilerneqarneranullu peqataanissaanut qilanaarpunga, Benny Nybo oqarpoq.