Uuliasiorneq
Obamap naalakkersuisuisa issittumi uuliasiorneq unitsippaat
Alloriarneq tulleq tassaassaaq Issittumi tamarmi uuliasiorluni qillerinerit unitsinneqarnissaat, aalajangernerullu tamassuma ataavartunngortinneqarnissaa, Greenpeace isumaqarpoq
Uuliasioqatigiiffissuup Shellip Alaskap issittortaani uuliasiorluni qillerinissaminik pilersaarumminik unitsitsinerata kingorna sapaatit akunnialunngui qaangiuttut USA-p naalakkersuisui maanna aalajangerput Alaskap avannaani imaani qillerinissamut akuersissutinik tuniniaaneq 2016-imi 2017-imilu taamaatiinnarniarlugu.
Avatangiisinut ajugaaneq
Tassa imaappoq Alaskap issittortaani pissutsit atuuttut pissutigalugit uuliasiornermik unitsitsigallarneq, tamannalu issittumi avatangiisinut sunnertiasunut, silap pissusianut aammalu inunnut millionilinnut, aalajangiinissamik tamassuminnga sorsuutiginnissimasunut, ajugaanerujussuuvoq, Greenpeace tusagassiorfinnut nalunaarutikkut allappoq.
– Ukiorpassuarni nunarsuarmi tamarmi inuit sorsuutigisimavaat USA-p issittumi uuliasiorluni qillerinerit unitsissagai, maannalu tamanna kinguneqarpoq, Jon Burgwald, Greenpeacemi issittumut akisussaasoq, oqarpoq.
– Issittumi qillerinissamut akuersissutinik tuniniaanerup unitsinneqarnissaanik aalajangerneq Issittup illersorniarnerani ajugaanerup ilagaa. Alloriarneq tulleq tassaassaaq Issittumi tamarmi uuliasiorluni qillerinerit unitsinneqarnissaat, aalajangernerullu tamassuma ataavartunngortinneqarnissaa.
Kalaallit Nunaat unitsitsisariaqarpoq
Issittumi avatangiisit sunnertiasut ilaat eqqissitinneqarallartut Issittumi sumiiffinni allani uuliasiorneq ingerlaannarpoq - ilaatigut Kalaallit Nunaata imartaani. Maanna piffissanngorpoq aamma kalaallit uuliasiornermik pilersaarutinik unitsitsinissaat, Greenpeace isumaqarpoq.
– Pisut kingulliit ersarissumik takutippaat issittumi uuliasiorluni qillerinerit aarlerinartortaqartut, imalu siunissakitsigisut uuliasioqatigiiffiit tunuaannarlutik naalakkersuisullu akuersaarumajunnaarelutik, Jon Burgwald oqarpoq.
– Issittumi uuliasiorluni qillerinerit unitsikkiartuaarneqarput, taamaattumillu Kalaallit Nunaanni naalakkkersuisut aamma avatangiisinik illersueqataasariakqarput uuliasiornerillu unitsillugit.
Naammattumik uuliaqanngilaq
Uuliasioqatigiiffissuup Alaskami uuliasiorluni qillerinerit ujaasinerlu akerlerineqartut unitsiinnarpai, pissutigalugu gas-imik uuliamillu naammattumik nassaarsimannginnami.
Tuluit-hollandimiut nukissiornermik ingerlatsiviat taamanikkut nalunaarpoq Alaskap kimmut sineriaata avannaani qilligaq Chukchi misissueqqinnissamut tunngavissiisimanngitsoq, selskabillu ilanngullugu oqaatigaa amerikami naalagaaffiit ilaata taassuma imartaani ingerlatsinertik unitsillugu.
/ritzau/