uulia

Obamap aamma Trudeaup uuliasiortitsiunnaarnerat ICC-p nersualaarpaa

ICC-mi siulittaasup Hjalmar Dahlip ukiortaami oqalugiaammini imaani aatsitassanik ujaasinernut ernumanini oqaatigaa

Silap pissusiata allanngoriartornera suliarisassanik periarfissanik aamma ajornartorsiutinik pilersitsivoq.

Kalaallit Nunaanni ICC-p siulittaasuata, Hjalmar Dahlip tamanna ukiortaami oqalugiarnermini naqissuserpaa.

Imaatigut angalanissamut periarfissat amerliartortut, kisianni aamma sikuerunnerani uuliamik gassimillu qalluinissap ajornannginneruleriartornera oqaatigaa.

- Baffinip Kangerliumarngata sineriaani tamaani inuit piniartuusut taamatut ineriartortoqarnissaanik nalorninartorsiortinneqalerput. Issittumi nunap immikkoortuini ICC-qarfinni, taamatullu ICC Kalaallit Nunaanni sinerissap avataani ingerlatsiniarnerit annertuumik ernummatigineqarput, Hjalmar Dahl oqarpoq.

Uuliasiorunnaarneq
Juullinngitsiartoq USA-p præsidenteriunnaagaata Barack Obamap aamma Canadamiut premierministeriat Justin Trudeaup, Issittup imartaani uuliasiornermut akuersissutinik tunniussisoqaqqinnginnissaa akueraat.

Atuaruk: WWF: Uulia taamaatinneqarli

Tamannalu alloriarneq Hjalmar Dahlip nersualaarpaa.

- Taamaammat Amerikami præsidentip tunuartussanngortup Obamap taama aarlerinartoqarnera paasilluarmagu nuannaarutigalugu tusarparput. Taamaalillunilu iliuuseqarsinnaatilluni aalajangikkaminut kingullernut ilaatillugu naalagaaffiup Amerikap Issittortaani imartani annertuunik nutaanik uuliasiortoqarnissaanut gassisiortoqarnissaanullu atajuartussamik inerteqqusiilluni. Kinguninngualu Canadami ministeriunerup Trudeaup Canadap Issittortaata imartaani assigisaanik aamma mattussilluni, taanna allappoq.

Atuaruk: Uuliasiornissamik taamaatitsineq tamanit nuannaarutigineqanngilaq

Issittumili aningaasarsiornerup ineriartortinneqarnissaa pingaaruteqarluinnartoq, tamatuma saniatigut oqaatigaa.

- Taamaalilluni ICC Alaska Issittumi aningaasarsiornikkut ineriartortitsineq pillugu peqataaffigineqarluartussamik 2017-imi marsip qaammataani Anchoragemi ataatsimeersuartitsiniarpoq, Hjalmar Dahl allappoq.

Powered by Labrador CMS