Nykøbing Falsterimi unammisartoq coronamik tunillatsittoq

Kalaallit Nykøbing Falster Håndboldimi unammisartut coronamik tunillatsinngillat.

Nykøbing Falster Håndboldimi kalaallit unammisartut qulingiluaapput, unammisartoqataat ataaseq coronamik tunillatsissimasoq paasineqarpoq uani sapaatip akunnerani.

Klubbini tassaneersoq Nikita van der Vliet coronamik tunillatsippoq. Tamanna paasineqareersoq klubbimi pitsaanermi unammisartut tamarmik, Lykke Frank Hansen ilanngullugu, angerlartitaapput.

Coronamik misissueqqinnermi Nikita van der Vliet suli coronamik tunillatseqqasoq paasineqarpoq, unammisartut sinneri tamarmik tunillatsissimanatik.

Tusagaq tupannartoq

Nykøbing Falster Håndbodip U19-ani unammisartoq Nukaaka Petrussen Lyberth Sermitsiaq.AG-mit oqaloqatigineqarpoq.

- Tunillatsissimasoq ulluinnarni takuneq ajorparput, kisianni qaninaarnarpoq coronavirusi. Maani coronamik tunillatsittut amerlavallaanngimmata eqqarsaatigivallaarneq ajorpara, soorunami taava tusagaq tupannarpoq, qaninaarnarluni aamma, Nukaaka Petrussen Lyberth oqarpoq.

Unamminissat taamaatiinnarneqartut

Nukaaka Petrussen Lyberth Frederiksbergimi unammeqattaarnerni peqataasussaagaluarpoq, unamminissalli taamaatiinnarneqarput.

- Arlaannik coronamik tunngatillugu sukaterisoqarsinnaaratarnera piareersimaffigeqquneqarpoq. Imaassinnaasormi angerlarsimaffimmi atuartitaalersugut - timersortarfik aamma taamaasilluni matuneqarallariataarsinnaavoq.

- Nuummut angerlarnissara toqqissisimanartinnerpaassavara matusisoqassappat, tassami siunnertaarutipajaassaaq maaniinnissara. Nuummut angerlassagumali taava danskit nalunaaqutaat malillugu atuartinneqartassaagut, oqaluttuarpoq.

Nykøbing Falster Håndboldtimi pitsaanerni unammisartut tamarmik ataasinngorpat coronaqarnersut misissorneqaqqissapput.

Powered by Labrador CMS