Nykøbing Falster Håndbold sølviusumik medaljennattoq

Ataqqinaataasaqisup Final4-ip assammik arsarluni unammiuaartitsinera Santander Cup arfininngormat sapaatiummallu Odense Idrætshalimi ingerlanneqarpoq.

Arfininngormat semifinalit marluk ingerlanneqarput. Semifinalimi siullermi Nykøbing Falster Håndbold sekundi kingullerpaaq atorlugu isertitsinermini København Håndboldimut målimik ataatsimik ajugaavoq. Odense Håndbold semifinalip aappaani Herning Ikastimut ajugaavoq.

Finalimi Jakob Larsenip sungiusartagai Nykøbing Falster Håndbold kalaallimik Lykke Frank Hansenimik ilaasoqartoq Danmarkimi mesterinngorlaanut Odense Håndboldimut unammivoq.

Timersortarfik sungaartunik aamma sungaartunik-aappalualaartunik atisalinnik ulikkaavissimavoq

NFH-ip unamminerani pisarnertut illersuisorpassuaqarpoq. Isiginnaariat 400-t bussinut ilaallutik namminnerlu biiliminnik Falserimiit Odensemukaasimapput.

Isiginnaariat ullunik puigungassarinngisaminnik misigisaqarput. Odensep atuarfiani unnuisimapput. Odense Å-milu finalertoqarnissaa sioqqullugu angalaarsimallutik.

Danmarkimi assammik arsartartut klubii Nykøbingimisulli illersuisartuminik peqataatitsisartiginngillat, taamaammat suut tamarmik pissusissamisuuginnartutut misinnarsimapput. Klubberpassuit tamanna ilinniarfigilluarsinnaavaat.

Aallartilluarsimasut

NFH finalimi aallartilluaqaaq. Odense Håndbold ilungersortinniarsimavaat, periarfissatillu atorlugit unammilluarsimallutik. Unammisaasali pisinnaasaqarnerunerat qaanngiinnagassaasimanngilaq.

Pingaartumik Odensemi hollandimioq assammik arsartartoq Lois Abbingh NFH-mi unammisartunut ajornartorsiortitsisarsimavoq. Unamminerup affaani kingullermi Odensermiut ajugaasutut misigisimaleruttortut, NFH-mi unammisartut nukitik nunngutaat atorlugit akiuulluarsimapput. Unammisamik isertitaat nalleraluttuinnarlugit naggataatigut marluinnarnik inuleraluarsimavaat.

Odensermiulli unammineq tiguaqqippaat, naggataatigullu 32-26-mik ajugaallutik.

Sølvinnappugut

NFH-p unaminermi marluusuni pikkorissortartik Kristiana ”Mulle” Kristiansen amigaatigisimavaat. Mulle tallimanngornermi kingullermik sungiusaramik ajoqusersimavoq.

-Angusarput tuulluussimaarutigissavarput. Kuultimik annaasaqanngilagut. Sølvinnappugut, ”Mulle” unammisoqareersoq tulluussimaqqisoq tusialluni ingerlaqqitsinnani Sermitsiaq.AG-mut oqarpoq.

Odensemi målmandi Danmarkimi nunanut allanut unammisartuusoq unammillualaavissimaqaaq, NFH-milu unammisartut isertitseriartarneranni arlaleriarluni annaassisarsimalluni.

Sungiusaasuunerup Jakob Larsenip unammineq naammassimmat nassuerutigaa, Odense ullormi unamminermi pitsaanerusimasoq.

Klubbi 150.000 koruuninnattoq

-Unammilluarnerit ajugaapput. Sutigut tamatigut pitsassuarnik unammisartoqarput.

- Målinik arfineq-pingasunik kinguaratta qujanartumik ingerlalluaqqilerpugut. Unammineq pissanganartunngortikkaluarparput, piffissallu ilaani målinik marluinnarnik inuleraluarlutigit. Iluatsitsinerulaarsimasuugutta immaqa naligiinnarsimasinnaagaluarpavut.

-Unammisartuvut tulluussimaarutigaakka. Coronap atuunnera unammisarnermut atatillugu eqqumiikajaarsimaqaaq, ilungersunartorsiortarsimaqaagut, taamaammat ullumikkut sølvinnannerput assut kusanarpoq, Jakob Larsen naggasiivoq.

Sølvinnannerup ataqqineqarnerullu saniatigut klubbi normu 2-nngorami 150.000 koruuninik akissarsitinneqarpoq.