Nuutoqqami akunnittarfiliorniarneq unitsiinnarneqartoq
Malaysiami akunnittarfiit Berjaya Corporation Berhadit pisortaat aalajangersimavoq Nuutoqqami akunnittarfiliorniarneq taamaatinnarneqassasoq.
Kommuneqarfik Sermersuumi kommunalbestyrelsimi ilaasortat amerlanersaasa Nuutoqqami akisuumik akunnittarfiliorniarneq pillugu suliniutip tusarniaassutigineaqarnissaanut akuersaarsimanera aalassatsitsisimaqaaq.
Akerliunerillu Kuala Lumpurimi, Malaysiami illoqarfiit annersaanni akunnittarfiliornissamut aningaasaliissuteqartut najugaqarfigisaanni tusaaneqarsimapput.
Innuttaasunut pitsaasumik atassuteqarusunneq
- Najukkami innuttaasut pitsaasumik atassuteqarfigerusuppavut. Nuummi suleqatigiilluarnissarput uagutsinnut pingaaruteqarpoq. Nuutoqqami akunnittarfiliorniarnitsinnut akerliusorpassuaqarnera ataqqivarput, taamaammat aalajangersimavugut kommuni qinnuigissallugu akunnittarfiliorfigisinnaasatsinnik allamik nassaarniaqqullugu, Berjaya Corporation Berhadip aqutsisoqarfiani sulisoq Alex Tan Ghee Keong Sermitsiaq.AG-mut ilisimatitsivoq.
- Kalaallit Nunaanni akunnittarfiliorusuppugut, qularinngilaralu nunani Asiamiittuni attaveqaaterpassuavut ikiorsiullugit kalaallit kulturiannik nittartaassisinnaalluta taamalu takornariarusuttorpassuarnik pilersitsisinnaalluta, Alex Tan Ghee Keong nassuiaavoq.
Illoqarfiup qeqqanut qanittuaraq
Sanarfinermut Avatangiisinullu Ingerlatsivik akunnittarfiup inissisimaffissaanik nutamik ujaasilluni aallartereersimavoq, naatsorsuutigineqarporlu Malaysiami aningaasaliissuteqarsimasut januaarip qaammataata ingerlanerani akunnittarfiliorfissamik nutaamik neqeroorfigineqassasut.
- Soorunami Nuup Kangerluanut illoqarfimmullu qanittuaqqamiinnissaa soqutigaarput. Akunnittarfiup illoqarfiup qeqqanut qanittuaqqami inissisimanissaa pingaaruteqarpoq. Iloqqarfiup qeqqanut qanittuaqqami inissisimanissarput pingaaruteqarpoq, Alex Tan Ghee Keong oqarpoq.
Akunnittarfissaq nutaamik titartaqqinneqassasoq
Taassuma ilisimatitsissutigaa, maanna suliniutaasoq atorunnaarsinneqassasoq, akunnittarfissarlu avatangiisiminut naapertuuttumik aallaqqaataanik titartaqqinneqassasoq. Sulili pilersaarutaavoq akunnittarfissaq 100-t missaannik initaqassasoq neriniartarfittaqassasorlu.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...