Inatsisartut ataatsimiittarfiat
Nuutoqaq allanngutsaaliorneqartariaqarpoq
Taamatut oqarpoq tusagassiortoq kulturimullu naalakkersuisuusimasoq Stephen Heilmann, Nuummi Aqqaluks Pladsimi Inatsisartut ataatsimiittarfissaannik sananissamut akerliulluni akerliussutsimik takutitsinermi oqaluginarnermini
Tarsuarmit Nuutoqqami amutsivitoqqamut illoqarfiup ilaa allanngutsaaliorneqarluinnartariaqarpoq. Taamatut oqarpoq tusagassiortoq kulturimullu naalakkersuisuusimasoq Stephen Heilmann, Aqqaluks Pladsimi inatsisartut ataatsimiittarfissaannik nutaamik sananissamut akerliussutsimik takutitsisorpassuarnut oqalugiarnermini.
– Naammaleqaaq, akerliussutsimik takutitsisut suaartarput, taarserneqartariaqarput. Akerliussutsimik takutitsinermi kamanneq pakatsinerlu ersarikkaluartut akerliussutsimik takutitsineq eqqissisimasumik ingerlavoq.
Arfininngormat ullaap tungaani Aqqaluks Pladsimi Inatsisartut sanaartorniarnerat akerliussutsimik takutitsivigineqarpoq. Politikerit arlallit, ilaatigut Inatsisartut siulittaasuat Lars-Emil Johansen, tassani Inatsisartut ataatsimiittarfissaannik 190 millioner koruunilimmik sananiarput.
Aqqaluks Pladsimi nutaanik illuliortoqassanngilaq
– Sumiiffritoqqami maani nutaanik sanaartortoqassanngilluinnarpoq, Stephen Heilmann akerliussutsimik takutitsisunut suaarpoq, tamakkualu isumaqataallutik politikerinut asissuillutik suaartarput.
– Eqqaamassavarput Kommuneqarfik Sermersooq naggataatigut aalajangiisussaammat. Suliaq malinnaavigisariaqarparput, taanna akerliussutsimik takutitsisunut oqarpoq.
Aamma Perer Stefani, Nuummi peroriartorsimasoq, pilersaarutaanngitsumik oqalugiarpoq.
– Sumiiffik manna nuannaraarput. Uagutsinnut erlinnartuuvoq attorneqassananilu! Naammaleqaaq! Peter Stefani suaarpoq, akerliussutsimillu takutitsisorpassuarnit ersaartaanneqarluni.
Kommunalbestyrelsimi Demokraatit akerliliiniarput
Politikerinit akisussaasunit oqalugiartoqanngilaq. Kommuneqarfik Sermersuumili kommunalbestyrelsimi illua'tungiliuttuneersoq Justus Hansen, Demokraatit, sassarpoq.
– Demokraatinit siunnersuut tamanna akerlilerumaarparput, politikeri akerliussutsimik takutitsisunut oqarpoq.
Arfininngormat akerliussutsimik takutitsinermi inuppassuit peqataapput. Politiit naatsorsuutigaat 1000-t angullugit amerlassusillit peqataasut.