Nuussuarmi sullorsuaq allilerneqalersoq
Kommuneqarfik Sermersuup, Nuummi illoqarfiup immikkoortortassaata Siorarsiorfiup tungaanut sullorsualiornissaq suliarinnittussarsiuuppagu, Nuummiit Nuussuarmut Qingutsinnullu sullorsuup allilerneqarnissaa ilanngullugu suliarinnittussarsiuunneqassaaq.
Nuuk ukiuni qulikkaani kingullerni inuttusiartorpoq, tamannalu aqquserniornerni malinnaaffigineqanngitsoorsimavoq. Sullorsuup atuutereersup allilerneqarneratigut, illoqarfiup qeqqaniit Nuussuarmut Qinngutsinnullu angallannermi ajornartorsiutaasartut iluarsiiffigineqarsinnaapput, kommunimit isumaqartoqarpoq.
Taamammat kommunalbestyrelsimi isumaqatigiissutigineqarsimavoq, illoqarfiup immikkoortortassaata Siorarsiorfiup tungaanut sullorsualiortussarsiornermut, sullorsuup allilerneqarnissaa ilanngullugu suliakkiutigineqassasoq.
Nuussuarmi angallannermik annikillisaassasoq
Kommuni nittartakkamigut allappoq, biilertartorpassuit sullorsuup silataani tullinnguunnissaminnut utaqqinissaq pinngitsoorniarlugu, aqqusineq Nuussuakkoortoq maannakkorpiaq atornerusaraat, tamannalu kommunimit allanngortinniarneqarpoq.
- Sullorsuup silissisinneqarnera illoqarfimmut tamarmut iluaqutaassaaq. Angallannermi siuleriiaatilertarneq oqaluttuaannanngussaaq aamma Nuussuarmi angallannerujussuarmik annikillisaataassalluni kiisalu aqquserngit pisuinnarnut isumannaannerulerlutillu aqqutigiuminarnerulissapput. Taamaattumik periarfissap tamatuma suliariumannittussarsiuunneqarnissaanik kommunalbestyrelsip aalajangernera assut nuannaarutigaara, Kommuneqarfik Sermersuumi borgmesteri Charlotte Ludvigsen (IA) oqarpoq .
Sullorsualiassat taakku marluk suliarinnittussarsiuunneqarnissaminnut piariingajalerput, kommuni Sermitsiaq.AG-mut ilisimatitsivoq. Tamanna qaammatip matuma naannginnerani pissasoq naatsorsuutigineqarpoq.
Aningaasat immikkoortinneqarsimasut
Illoqarfiup immikkoortortaata nutaap tungaanut sullorsuassaq, pilersaarutit malillugit 2023-mi suliaralugu naammassineqarsimassaaq, sullorsuarmilli atuutereersumik alliliineq ukiumi tulliuttumil, piffissap taamaalinefrani naammassineqarsimanissaa naatsorsuutigineqarluni.
Sullorsuarnik marlunnik suliaqarnissap ataatsimoortinneratigut kommune annertuumik sipaaruteqarnissaa naatsorsuutigineqarpoq, taamaaliornikkummi atortussat pisariaqartut Nuummut tikisinneqartussat ataatsikkut tikisinneqarsinnaassapput, soorlu aamma sulisut pisariaqartinneqartussat ataatsimooreersimassasut, kommunip tunngavilersuutaa taamatut nipeqarpoq. Kommunimit Sermitsiaq.AG-mut ilisimatitsissutigineqarpoq, sullorsuup atuutereersup allilerneqarnissaanut aningaasanik immikkoortitsisoqareersimasoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...