Nuussuarmi aqqut inuussutissarsiornermut iluaqutaasinnaavoq
Nuussuaq itivillugu ukiuunerani aqqut Qeqertarsuup Tunuani kiisalu Uummannami nunaqarfiinilu inuussutissarsiornermut iluaqutaalluarsinnaasoq.
Uummannap Sulluata qinnguaniit, Nuussuaq itivillugu, Ilulissat avannaani nunaqarfiup Qeqertap iluatungaanut ukiuunerani nunakkut aqqutip qaangaaniilli atorneqartup inerisaaffigineratigut, inuussutissarsiornikkut periarfissat assigiinngitsut ammaanneqarsinnaasut.
Uummannami Royal Greenlandimi teknikkikkut pisortaq, uanili nammineq inuttut isummersortoq, taassumalu nukaa Uummannaq Seasafarissimik piginneqataasoq, Paaluk Kreutzmann isumaqartut, aviisi Sermitsiaq allappoq.
Ukiuunerani assartuineq ajornarsisartoq
Uummannap eqqaani nunaqarfinni sisamani Royal Greenlandip aalisakkeriviutaasa ukiuunerani ingerlaannarnissaat qulakkeerniarlugu, qalerallit qerisut uninngasuutigineqartut Uummannamut sikukkut assartorneqartarput. Januaarip februarillu ingerlanerani nunaqarfiit aalisakkeriviiniik qalerallit qerisut tonserpassuit Uummannamut sikukkut assartorneqarput, taakkulu upernaakkut sikueraangat Royal Arctic Linep umiarsuaataanut usingiarneqartarput. Uummannalli Sullua sikkorlutsillugu sikuersimatilluguluunniit qaleralinnik assartuiniarneq ajornakusuulertarpoq, taamaaligaangallu aalisakkeriviit ukiukkut ammaannarnissaat qulakkeerneqarsinnaaneq ajorpoq.
Ilulissaniit Qaarsuarsunni suluusalinnut mittarfimmut ukioq kaajallallugu ilaasunik nioqqutissanillu assartuisoqartarpoq, assartugassalli oqimaannerusut, soorlu aalisakkerivinni kingoraartissat assigiinngitsut, nassiunniarneri ajornakusoorsinnaasarpoq, pisariaqartitallu pissarsiarinissaannut sikuernissaata tungaanut imaatigut umiarsuit assartuutit qaammatini arlalinni utaqqeqqaarneqartariaqarput.
Aviisimi Sermitsiami atuarnerusinnaavutit. Aviisi uani pissarsiariuk:
