isorliunerusut
Nuussinissamik siunnersuut Naalakkersuisut itigartippaat
Borgmesterit Siumumeersut pingasut suliffippassuarnik Nuummit sinerissamut nuussinissamik siunnersuutaat naalakkersuisooqatigiinni siulittaasut pingasut itigartippaat
Borgmesterit pingasut Ole Dorphip, Jørgen Wæver Johansenip Hermann Berthelsenillu Kalaallit Nunaanni naligiinnerulernissaq pilersinniarlugu suliffinnik 600-nik Nuummit sinerissamut nuussinissamik siunnersuutaat Naalakkersuisunit taperserneqanngilaq.
Tamanna Sermitsiami isumaliutersuummi atuarneqarsinnaavoq, tassuuna partiini siulittaasut pingasut Kim Kielsenip, Siumut, Randi Vestergaard Evaldsenip, Demokraatit, aamma Knud Kristiansenip, Atassut, siunnersuut itigartimmassuk.
Avissaartuineq iluaqutaanavianngilaq
Siulittaasut ilaatigut erseqqissarpaat nuna tamakkerlugu politikerit kiisalu kommunit sisamat Kalaallit Nunaata unammilligassai aaqqinniarlugit suleqatigiittariaqartut. Taamaasilluni aqqutissaasinnaanngilaq kommunip ataatsip aningaasaqarniarnikkut tunngaviata annikililsarniarnissaa, allani pingasuni siuariartornermik pilersitsiniarluni.
Suliassat tunniuttarlugit
– Taamaattumik Naalakkerseuisunut orniginarneruvoq kommuninik suleqateqarnerup nanginneqarnissaa suliassallu amerlanerusut taakkununnga tunniuttarlugit, suliffiit pioreersut nutsernagit tamatumuunga aningaasartuutissat suliallu aaqqinneqarnissaanni ataqatigiissoqarnissaa isiginiarnagit. Tamatumunnga atatillugu pisariaqarpoq suliat ataatsimoorluta aaqqinniarnissaat, ineriartornerullu aqunneqannginnissaa sumiiffik eqqarsaatigalugu aammalu kommunit aaqqiagiinngissuteqarnerat isumaqatigiinngissuteqarnerallu pissutigalugit, partiit siulittaasui pingasut isumaiutersuumminni allapput.
– Nukivut nunap iluani politikkersornikkut aaqqiagiinngissuteqarnernut atussagutsigik ataatsimut anguniakkat naammassiniarnissaannut nukissaqarnavianngilagut, taakkua erseqqissaapput.
Isumaliutersuutikkut Kim KIelsenip tunuliaquttani akerlilerpai, tassa gruppimi siulittaasup Jens Immanuelsenip borgmesterit siunnersuutaat tapersermagu.
Isumaliutersuut kiisalu borgmesterit pingasut siunnersuutaannik sualuttumik allaaserisat Sermitsiami normu 7-mi atuakkit. Aviisi piniarfimmi imaluunniit ataani linki atorlugu pisiarisinnaavat