isorliunerusut
Nuussinissamik siunnersuut aamma Siumut Nuup itigartippaa
Sermersuumi Siumut sinnerlugu kommunalbestyrelsimut ilaasortat pingasut atorfinnik nuussinissamut siunnersuut akerleraat. Kinguneqaatissai iluamik misissorneqarsimanngillat
Pisortat suliffiutaannik 600-nik Nuummit sinerissamut nuussinissamik siunnersuut avissaartortitsivoq.
Tamatuminnga siunnersuuteqartuupput borgmesterit pingasut Siumumeersut Ole Dorph, Jørgen Wæver Johansen aamma Hermann Berthelsen.
Siumut Nuup siunnersuut akerleraa
Kommuneqarfik Sermersuumili borgmesterit parteeqataasa, Ane Egede Mathæussenip, Per Berthelsenip kiisalu Peter Davidsenip siunnersuut itigartippaat.
– Kinguneqaatissai peqqissaartumik misissorneqarsimanngillat. Aningaasatigut kinguneqaatissanik imaluunniit sulisut sulinermi atugarisaannut kinguneqaatissanik saqqummiussaqartoqanngilaq, Ane Egede Mathæussen, Per Berthelsen Peter Davidsenilu erseqqissaapput, taakkulu Kommuneqarfik Sermersuumi aningaasanut ataatsimiititaliamut ilaasortaapput.
Suliffinnik pilersitsisoqartariaqarpoq
Nuussinissamik siunnersuut akerlerigaluarlugu taakkua illoqarfinni assigiinngitsunik suliffinnik amerlanerusunik pilersitsisoqartariaqarneranik eqqarsarneq taperserpaat.
– Naalakkersuisut, Inatsisartut kommunillu ataatsimoorlutik oqaluuserisariaqarpaat qanoq isilluni Kalaallit Nunaanni suliffinnik pilersitsisoqarsinnaanersoq. Nuna ataatsimoorluni pilersitsissaaq periarfissanillu nassaarniarluni, Peter Davidsen parteeqanni sinnerlugit oqarpoq.
– Siunnersuutigaarput ingerlatsiviit pisortanit pigineqartut, ullumikkut nunani allaniittut, angerlartittariaqartut. Tamakkua illoqarfinnut inissinnerisigut suliffinnik pilersitsisoqassaaq, Ane Egede Mathæussen, Per Berthelsen Peter Davidsenilu oqarput.