Nuup kujataani ujaasineq ajunngitsumik kinguneqartoq
Inuit arfinillit qimmillu marluk tallimanngornerup unnuaani umiatsiamit annaanneqarput. Taakku angallataat ikkarlissimavoq kivillunilu.
Aasiaat Radio tallimanngornermi nalunaaqutaq 23.11 mayday-ertumik kalerrinneqarpoq. Kalerriisoqarnera Aasiaat Radioata politiinut Arktisk Kommandomullu ingerlateqqippaa, ujaasinerlu Arktisk Kommandomit aallartinneqarpoq.
- Kalerrisaarineq Qeqertarsuatsiaap eqqaani pisimasoq takusinnaavarput. Nakkutilliiartortartorput Knud Rasmussen Nuummiit kujammut aallartipallapparput, Arktisk Kommandomi pigaartuni officeri, Mads Als Sermitsiaq.AG-mut oqarpoq.
Arktisk Kommandop angallataa Triton qulimiguulimmik issimasoqartoq Nuup kujataaniit Qeqertarsuatsiaat tungaanut aamma aallartinneqarpoq, ujaasineq imaatigut silaannakkullu ingerlanneqarsinnaaniassammat. Ajunaalernermimmi kalerrisaarisut attaveqartitsivik Qeqertarsuatsiaat eqqaaniittoq atorlugu kalerrisaarigamik sumiissusertik nalunaarutigisimanngilaat, taamaattorli attaveqaasersuut 50 kilometerisut isorartutigisumiit atorneqarsinnaasarluni.
Umiatsiaq sumiiffimmiittoq
Arktisk Kommandop ujaasinera kinguninngua taamaatinneqarsimavoq. Ajunaalernermimmi kalerriisut annanniummi umiatsiaaqqamiittut umiatsiap allap saneqquttup naammattoorsimavai, ajunaalernermillu kalerrisaarisimasut, inuit arfinillit qimmillu marluk, umiatsiamit annaanneqarsimallutik.
Arktisk Kommandop paasissutissaatai naapertorlugit angalasut angallataat ikkarlissimavoq kivillunilu. Issimasut arfinillit qimmillu marluk angallatip annanniutaanut ikisinnaasimapput.
Kalaallit Nunaata Politiivisa ilisimatitsissutigaat annaanneqartut ajunngitsut.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...