Skip to main content

Nuup iluani sermeq uukkartartoq navianarlunilu periarfissapassuaqartitsivoq

Narsap Sermia Nuup Kangerluata qinnguaniittoq uukkartaleriasaarmat siunissami qanoq sunniuteqarumaarnersoq ilisimatusartut misissorpaat.

Kangerluk ukiuni kingullerni marlussunni iluliaqarneruleriartorpoq. Taamaassorinninnerinnaanani ilumoorpoq. Narsammi Sermia Nuup Kangerluata qinnguaniittoq ukiuni 150-ini uukkaasarsimanngilaq. Taamaalerporli. Ukiut qulit 15-illu ingerlaneranni ima uukkaasartigaaq allaat kilometerinik 20-nik tiffarsimalluni.

Nuuk Ugeavis allappoq.

Misissuinerit

Sermeq uukkaasalertoq pillugu ilisimatusartut University of Liverpoolimeersut Asiaq suleqatigalugu sermip qanoq annertutigisumik uukkaasarnera misissoriartorpaat. Dominik Fahrner PhD-iliuumminik, EPSRC/ESRC-imit Institute of Risk and Uncertainty-meersumit aningaasalerneqarluni, misissuiniarluni aalajangerpoq.

Assilsat tulleriaartillugit

Misissuineq aallaqqaammut assiliisarluni pissaaq sermillu assileqattaarneri tulleriiaarlugit sukkasuunngortinneqassallutik. Tassa nalunaaquttap akunnikkuutaarlugit sermimik assiliisassaaq. Assiliivik matoqarpoq Asiamillu isumagineqarluni. Qaarsumut aalajangersimavoq assilisallu toorninnguakkuutaarlugit misissorneqarsinnaassallutik taamaasilluni sermeq qanoq angitigisumik tunuariarnersoq takuneqarsinnaassalluni. Sermeq taanna siusinnerusukkut misissuiffigineqarsimanngilaq taamaammallu ilisimatusartut Liverpoolimeersut Asiameersullu assilisat aappaagu aanissaat qilanaareqaat.

Ilulissat anginerullutillu amerlanerupput

Sermeq kilometerialunnguanik ilorpasinnerusoq 2-300 meterisut portutigisoq ilisimaneqartoq ilisimatusartoq James M. Lea oqarpoq, taamaammallu ilulissat kaanngartussat nunatsinni portunerpaassallutik. Tassa ilulissat ilaat ullumikkut takusartakkatsinnit anginerussapput. Taakkua Kapisilinnukartunut taqqamanngaanniillu silammukartunut ulorianaarsinnaapput aammali Nuup eqqaani ulorianaateqarsinnaallutik. Ilulissammi silammukarlutik Nuup umiarsualivianut pulammaallutik milikartissinnaavaat ilaallu Kapisillit Nuullu saavanniittut aserussagunik malerujussuarmik pilersitsisussaallutik.

Takornarianut piukkunnartoq

– Navianartuinnaanngilarli. Anginerumaanik uukkartoqartalerpat ilorpasinnerusumut angalasoqarsinnaalissaaq James M. Lea nassuiaavoq. Uukkartartut ullumikkutut amerlatiginavianngillat taamaammallu takornarianik angallassisartut Ilulissanisulli sermimut qanillillutik ingerlasinnaalissapput takornariallu takusassaqartinnerulerlugit. Ilulissalli Ilulissat Kangerluanit aniasutut angitigilernissaat ilimaginngilaa ilumulli taamaassanersoq piffissanngorpat takujumaarparput.

Aalisarnermut ajunngilaq

Ilulissat anginerullutik uukkartalerpata aalisarnermut sunniuteqarluarsinnaanera ilisimatusartut ilimagaat. Nuup iluani ullumikkut qaleralinniartoqartareerpoq. Ilulissallu angininngorlutik uukkartalerpata kangerluup qinnguani uumasoqarneranut sunniuteqassaaq. Imeq sermimeersoq kuuleraangat kangerluup naqqa aalassatsinneqartassaaq mineralillu kaanngartinneqartut uumasoqarnerulersitsissallutik. Taava uumasut, soorlu qalerallit aammali aalisagarpasuit allat, aamma miluumasut, soorlu puisit, nerisassaat amerlissapput.

Piniariarfinnut ajornaannerulissaaq

Kangerluup qinnguiata ilaa iluliaqaaluttarlunilu sikualoqartaqimmat maanna tikinneqarsinnaarpiartanngilaq. Anginerusulli uukkartalerpata sikualuit taama amerlatigisarunnaassapput. Taava piniarfiartarfiit pilerinarnerit kangerluup qinnguata iluaniittut
sikualoqarnerusarneranit ullumikkut tikikkuminaannerusut tikikkuminarnerulissapput.

Aallartinnerinnaraa

Ilisimatusartut tassaasoq Dominik Fahrner sermersioorlu James M. Lea Univerity of Liverpoolimeersut Martin Olsen Asiameersoq ilagalugu assiliivilersorput. Suliaat ukiuni sisamani suliarineqartussaavoq taamalu piffissaqarlutik sermeq qanoq piartuaarumaarnersoq pillugu paasissutissanik naammattunik peqalissallutik. James M. Lealli amerlanerusunik
assiliivilersorsinnaanissaq pillugu inuussutissarsiortunik suleqateqarsinnaanerarpoq taamaasilluni ilulissat uukkartut sukkut ingerlallutik silammukartarnersut qanorlu navianartigisinnaanersut paasiniarneqarsinnaassammat.

Paasisaqarnerorusupput

Amerlanerpaat siunissamut sillimanissaat pillugu misissuisoqarpoq. Taamaammat misissukkat inerneri qanoq ittuunersut James M. Leap takutittarusuppai. Aamma nunaqavissut sermip qanoq inneranik misilittakkaminnik oqaluttuaat tusarusuppai. Suliffeqarfiit Kapisillit Nuullu eqqaani iluliaqarnerulerpat piffissaq ungasinnerusoq isigalugu iluaquserneqarsinnaanersut
navialitinneqarsinnaanersulluunniit aamma tusagaqarfigerusuppaa. Kikkulluunniit paasissutaasinnaasunik peqartut soqutigai ingerlaavartumillu paasissutisseerusuttut mailimut uunga nassiussisinnaapput NuukGlaciers@gmail.com

Allaaserisaq Nuuk Ugeavisiminngaanneertuuvoq, taanna uani digitalinngorlugu pisinnaavat:

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER