Nuup eqqaani tammajuitsussarsiniarluni piniarnermut sakkortuumik akerliusoqarnera misissuinerup ersarissarpaa

Nuummi inuiaqatigiit akornanni sumiiffiup tammajuitsussarsiniarluni piniarfittut toqqarneqarnissaa pillugu soqutigisat aporaannerat, Pinngortitaleriffimmi ilisimatusartup Kristine Lynge-Pedersenip misissuiffigaa.

Misissuineq nutaatut internetikkut tamanut ammasumik peqataaffigineqarsinnaavoq, tassani innuttaasut Nuup Kangerluani Nunatarsuup tammajuitsussarsiniarluni piniarfinngortinneqassanersoq pillugu apeqqutinik akisaqarsinnaapput.

- Misissuinerup assigiinngiiaartumik ilusilersorneqarnera naammagisimaarlugu oqarusuppunga, aamma akissutit pissarsiavut, Kristine Lynge-Pedersen oqarpoq, taassuma misissuisuni peqataasunit 44-nit akissutit suliarisimavai.

Amerlanerit akerliusut – kisianni allanik siunnersuuteqartut

Misissuinermut peqataasut amerlanerpaartaat sunngiffimmi pinialuttartuupput, Nunatarsuullu akuersissuteqarfinngornissaanut siunnersuummut amerlanerit akerliupput. Peqataasulli piniariartarfimmut akuersissuteqarfissap allami inissisimaffigisinnaasaanik siunnersuuteqartut ilisimatusartut maluginiarpaa:

- Aalajangiisartutut – kommunalbestyrelsimi ilaasortat – amerlanerit akerliusut paasissallugu pingaaruteqarpoq, kisianni aamma sumi akuersissuteqarfeqalernissaanut siunnersuuteqarfigineqarnissaq pisariaqartippaa.

- Akissuteqartut ima itigartitsiinnanngillat; Nunatarsuarmi tammajuitsussarsiniarfik itigartipparput. Pitsaasunik siunnersuuteqarput, Kristine Lynge-Pedersen oqarpoq.

Misissuinermut peqataasut Nuup kujataani sumiiffinnik, Paamiuni aamma Qeqertarsuatsiaani siunnersuuteqarput. Kangerlussuaq aamma tammajuitsussarsiniarluni piniariartarfissatut taaneqarpoq.

Inuussutissarsiutigalugu sunngiffimmilu piniarneq kiisalu tammajuitsussarsiniarneq immikkoortinneqartariaqarput

Misissuinerup inernerani qitiusoq alla tassaavoq, inuussutissarsiutigalugu piniartut aamma sunngiffimmi piniartut kiisalu tammajuitsussarsiniarluni piniartut susassareqatigiinnerannut tunngavoq.

Akuersissuteqartarnermut inatsit malillugu soqutigisaqartut tamarmik nunami aalajangersimasumi tamarmik angallassinnaasariaqarput, taamaattumillu misissuinermut peqataasut tuperfissanik aamma piniariarfissanik kiisalu piniarnermi aqqutissaasinnaasunik siunnersuuteqartussaapput.

- Nunatarsuup akuersissuteqarfinngornissaanut siunnersuummut ilaat kommunip paasititsiniarluni ataatsimiititsinerani aamma Facebookimi iluarinninnatik oqariartuuteqarput, taamaammat iluarinninnginnerup pitsaasumik susassareqatigiinnerannut qanoq mumisitsisoqarsinnaanera paaserusussimavarput.

Akuersissuteqartarnermut inatsit naapertorlugu inuussutissarsiutigalugu sunngiffimmilu piniartut akuersissuteqarfiusut suli atorsinnaasariaqarpaat, taakkulu susassareqatigiinnerannut tuperfiit, kisarfiit, aamma piniarnermi angalaffissat ataatsimut aaqqissuussiffigineqarnerisigut qulakkeerneqarsinnaapput:

- Peqataasut taamaattumik tuperfiit, kisarfiit aamma piniarnermi angalaffissat aaqqissorneqarnissaannut siunnersuuteqaqquneqarput. Inernerisali takutippaat, tammajuitsussarsiniarlutik piniariartut tupertarfii, kisarfii aamma piniarnermi angalaffissaat immikkut inissinneqassasut kaammattuutigineqartoq, aamma tammajuitsussarsiniarluni piniartut najugaqartut piniartarfiisa avataannut inissinneqassasut, Kristine Lynge-Pedersen oqaluttuarpoq.

Nakkutilliisoqarnerunissaanik kissaateqartut

Inernerit taakku aalajangiisartut isummerfigisinnaavaat aaqqiissutissamillu nassaarniarsaralutik:

- Nunarsuarmi qeqertat annersaani sumiiffinnik amerlasuunik uumasoqarluartumik najugaqartilluta, tammajuitsussarsiniarluni akuersissuteqarfinnik nutaanik, najukkami piniartunut akornutaanngitsunik inissiisoqarsinnaassasoq eqqarsarpunga.

Ilisimatusartup aamma akuersissuteqarfioreersut aallunneqarsinnaanerat periarfissaasoq oqaatigaa, taakkulu pitsaanerpaamik ingerlanneqarnissaat, maanna tammajuitsussarsiniarluni piniarusuttut amerlassusaannik naammassinnittunngorlugit.

- Tamatuma peqatigisaanik inerniliussaq alla oqaatigerusuppara, tassani akuersissuteqarfiusuni aamma tammajuitsussarsiniarluni piniarfiusuni nakkutilliinerup tulluarsarneqarnissaanik annertuumik kissaateqartoqarnera takutinneqarpoq. Nakkutilliisoqarnerulernerani pitsaasumik susassareqatigiinnermik qulakkeerinnittoqarnissaa aamma uumasut akornusersorneqarnerisa killilerneqarnissaa naatsorsuutigineqarpoq, sumiiffiullu eqqissisimaneranik attassissasoq, Kristine Lynge-Pedersen oqarpoq.

Misissuineq nanginneqarpoq

Misissuinerup inerneri ilaatigut Kommuneqarfik Sermersuumut, akuersissuteqarfiliortoqarnissaanik aalajangiisussanut tunniunneqarsimasoq, Kristine Lynge-Pedersen oqaluttuarpoq.

Misissuinertaaq ingerlaqqippoq, tassani inerniliussanut malitseqartitsilluni apeqquteqartoqarpoq. Ilaatigut misissuinermut peqataasut tammajuitsussarsiniarluni piniarnermut sooq ilaarusunnginnersut, naak piumaneqaraluartoq:

- Misissuineq tammajuitsussarsinarluni piniartitsinermut tunngagaluartoq, taamaalillunilu piniarnermi takornariartitsinerup ineriartortinneqarnissaanut tunngagaluartoq, takornariartitsinermik sulialinnik peqataasoqanngilaq, tamannalu misissussallugu soqutiginartikkaluarpara.

- Najukkami takornariartitsisartut amerlanerusut takornariartitsisartut pillugit misissuinernut peqataasalissappata qanoq iliortoqarsinnaava, taamaattumillu nittartakkakkut apeqqutitut suliaraaram Kristine Lynge-Pedersen nassuiaavoq.

Nittartakkakkut inernerit quppernerat uani nassaarisinnaavat.

Misissuinermi digitalimik periuseq siamasissumik peqataatitsiniarluni atorneqarpoq:

• Inuiaqatigiinni siamasissumik peqataatitsineq anguniarlugu misissuinermi digitalimik periuseq atorneqarpoq, akissuteqartut angerlarsimaffimmit piffissamilu nammineq toqqakkamit peqataanissaannik periarfissillugit
• Peqataasut isummersornissamut innuttaasunik ataatsimiititsinermut takkunnissamik piumaffigineqanngillat
• Tamatuma saniatigut misissuinermi apeqqutit soqutigisaqartut soorlu kommuni, Namminersorlutik Oqartussat, aalisartut piniartullu peqatigiiffii kiisalu akuersissuteqalernissamut qinnuteqartoq peqatigalugit ilusilersorneqarput.
• Soqutigisaqartut suleqatiginiarneqarneri piffissamik nukinnillu atuiffiupput, kisianni suliap ingerlanera pissarsiffiullunilu iluatsilluarpoq, ilisimatusartoq oqarpoq:
• - Inernerit nutaaliaasumik takutinnissaat aalajangiupparput, nittartakkakkut inernerit saqqummiullugit, taakku kikkut tamarmik qaqugukkulluunniit alakkarsinnaavaat.