Nuup eqqaani annaassiniarsimaneq: Umiatsiaq ikkarlussimavoq
Inuit sisamat umiatsiartik putulluni immalermat nunamukaanneqarsimapput.
Kalaallit Nunaanni Politiit sisamanngornermi unnukkut nalunaaqutaq 22.15-ip missaani umiatsiamit Nuup avataaniittumit ajornartoortoqarnera pillugu nalunaarfigineqarsimapput.
Umiatsiaq inunnik sisamanik issimasulik ikkarlussimavoq.
Pigaartut pisortaata Malik Olesenip oqaluttuaraa, umiatsiaq immalersimasoq motooriatalu sarpia katassimannguatsiarluni.
Politiit taamaammat annaassiniarnissaq aallartillugu angallatertik Nakuaq ajornartorsiortoortunukartissimavaat.
Politiilli ajornartoortunut sisamaasunut suli apuutinngitsut angallammit allamit ajornartoortut ikiorneqarsimapput:
- Qujanartumik angallatip allap nalunaarfigineqarnitta kinguninnguatigut inuit sisamat ajornartoortut ikiorsimavai, pigaartut pisortaat oqaluttuarpoq.
Politiit angallataat takkummat inuit sisamat politiit angallataannut ikineqarsimapput. Taakku tamarmik Nuummukaanneqarput, ajoqusersimanatilli.
Pigaartut pisortaata Malik Olesenip oqaluttuaraa, imaatigut angallanneq aallarteruttormat piffissami aggersumi taama ittunik suliassaqartarnissaq politiinit naatsorsuutigineqartoq. Pigaartullu pisortaata tassunga atatillugu inunnut eqqaamaqquaa, angalanerminni atortunik eqqortunik nassataqartarnissaq.
- Ilaatigut pineqarput annanniutit puttasinnaasut, eqqortumik sumiissusersiortoqarniassammat gps-ikkut atortut minnerunngitsumillu vhf-radio, Malik Olesen oqarpoq.