Nuup annerpaartaani innaallagianeqqippoq
Nuummi 17 tiimit sinnerlugu innaallagiaqanngereersorlu maanna Nuup annerpaartaani innaallagianeqqippoq. Nuup illoqarfiani, Nuussuarmi Qinngorpumilu nalunaaqutaq 15.00-ip missaani innaallagianeqqippoq. Sumiiffinnilu annertunngittuni suli innaallagiaqanngilaq internettilu suli ataavartumik atuutsinnani.
Nuup annerpaartaani maanna innaallagiaqaleqqippoq, sumiiffiillu ilai suli innaallagiaqanngillat. Illoqarfiup pingaarnersaa ippassaq unnukkut nalunaaqutaq 23.00 missaani innaallagiaaruppoq.
Innaallagiaarunnerup nuna tamakkerlugu sunniuteqarpoq. Oqarasuaatit attaveqaatai, innaallagiaq nittartakkakkullu atassuteqaatit Nuummi atorneqarsinnaasimanngillat. Innuttaasut peqqinnissaqarfimmut politiinulluunniit attaveqarsinnaanatik. Nuna tamakkerlugu oqarasuaatikkut attaveqaatit atassuteqaatillu sunnerneqarput, Tusass innaallagiamik amigaateqarnera pissutigalugu.
Aaqqissuisoqarfiup Nukissiorfimmut pisoq pillugu attaveqarniaraluarpoq sulilu iluatsinngitsumik. Suliffeqarfiullu facebookimini kingullermik ullaakkut arfineq-marlut missaani allaaseqisaqarpoq.
Politiit immikkut iliuuseqartoq
Politiit immikkut ittumik Nuummi innuttaasunut sullissillutit ullup ingerlanerani aallartipput. Politiit illoqarfimmi angalaarput arlaatigut pinartoqassagaluarpat innuttaasunit saaffigineqarsinnaaniassammata.