Nuunu suliaritissimasoq: Nukittunerullunga uteqqissaanga
Sisoraatinik sangusaartartup Nuunu Chemnitz Berthelsenip unammisaqattaarnera unippoq. Sungiusarami ajoquserujussuarsimavoq, taamalu ukiuunerani OL-imut anngussinnaajunnaarluni.
Kalaallip sisoraatinik sangusaartartup Nuunu Chemnitz Berthelsenip ukiuunerani OL-imut qaammatip tulliani aallartittussamut anngunniarnermini januaarip qaammataa sungiusarfissatut aalajangiussimagaluarpaa.
Anngunniullunili unammiuaarnissamut sungiusarnermini ajutoorami ajoqusersimavoq.
- Decembarip 31-ani Italiami sungiusarlunga ajoquserpunga. Ingerlaannaq malugisinnaasimavara seeqqora talerperleq ajorluinnartoq, paasinarsivorlu seeqqumma ujalorsua kittorarsimasoq, Nuunu Sermitsiaq.AG-mut oqarpoq.
Sisorartartuunermini aappassaa ajoqusertoq
Østrigimi januaarip aappaani suliaritissimavoq, ullunilu qaninnerni Nuummut angerlassalluni. Sisorartartuunerani aappassaa seeqquata ujalorsua kittorarsimavoq.
- Qaammatit arfinillit tulliuttut sungiusarlunga ingerlatsissaanga, taanna ilisimatitsivoq.
Ukiuni kingullerni pitsaanerulerniarluni sungiusartarsimaqaaq, taamaammallu piffissami sinneruttumi sungiusaqqissinnaannginnini ajuusaarutigalugu.
Pisinnaasani angoqqikkusukkaa
- Soorunami tamanna oqimaappoq, pingaartumik OL-eqartussaammat. Aningaasaliisartuniilli, ilaquttanniit, ikinngutinniit aappanniillu tapersersorluarneqarpunga. Tamatuma nukissanik annertuumik tunisarpaanga, qularutiginngilaralu nukittunerullunga uteqqikkumaarlunga, 25-nik ukiulik Nuunu Chemnitz Berthelsen oqaluttuarpoq.
- Sisorartarnera tassunga killeqartoq sukkulluunniit eqqarsaatigisimanngilara. Suli pitsaanerulernissannut nukissaqarpunga. Sisorartarnera unitsikkukku kingumut qiviarlunga ilippanaatikka angusimanerlugit eqqarsaatigissavara. Misigisimavungali tamanna suli angusimanagu.
- Sapinngisannik tamaviaartarsimallunga misigerusuppata, suliarisartakkakkalu nuannarilluinnarpakka, Nuunu Chemnitz Berthelsen oqarpoq.