Nuunu OL-imut peqataanissamut qanilliartorpoq
Sisoraatinik sangusaartartoq Nuunu Chemnitz Berthelsen ukiuunerani OL-imut februarimi pisussami peqataasinnaanissaminut isumalluarpoq. Maanna pisortatigoortumik unamminerni sapinngisani tamaat peqataaniarsarivoq FIS pointinik amerlanerpaanik katersiniarluni. FIS-pointit OL-imut peqataanissaanut apeqqutaalluinnarput.
Nuunu Chemnitz Berthelsen OL-imut anngukkusulluni sungiusartarnini allanngortissimavaa. Nutaamik sungiusaassutaarsimavoq crossfittimilu aallartilluni.
- Ingerlalluarpunga. Sungiusaasortaarnikuuvunga uannik niviarsiaqqanillu allanik marlunnik sungiusaasartumik, taamaalillunga aallunneqarnerulerpunga. Siornatigut eqimattami inuit arfineq-marluniit arfineq-pingasut tungaannut amerlassusillit sungiusaqatigisarpakka, Nuunu Chemnitz Berthelsen, Italiami illoqarfimmi Livignomi pisuttuartoq aningaasaleeqataasuisa Royal Greenlandip naapinnerani taama oqarpoq.
Sisorartartoq sapaatip akunnerata naanerani FIS-mut unammeqataasaaq Europa Cupimullu sapaatip akunnerata tulluani peqataasalluni. Suut tamaasa ingerlalluariarpata OL-imut anngussimanersoq januarip 15-ani sioqqulluguluunniit paasissavaa.
- Isumalluarlungalu unamminissamut piareersimalluartutut misigisimavunga. Aasaq Crossfit Inuami aapparma anaanaatalu ilaserimmannga sungiusartalerpunga. Taamatut sungiusarnerup nukittunerulersippaanga, oqarpoq.
Qisuariartaassuseq atorlugu sisorarneq
Sisorarneq sukkasangaarmat eqqarsarnissamut piffissaqarfiuneq ajortoq, Nuunu Chemnitz Berthelsenip oqaluttuaraa. Taanna maanna aamma tarnikkut sungiusartarpoq sekundip ataatsip iluani ajorsartinneqaratarsinnaaneq eqqarsaatigalugu.
- Sangusaarluni unammineq sukkangaarmat qisuariataarsinnaassuseq atorlugu sisusoqartarpoq. Akunnermut 60 kilometerinik sukkatigaluni sisutilluni eqqarsarnissamut periarfissaqanngilaq. Taamaammat sisorarfinni pissutsinilu assigiinngitsuni sungiusartarnissaq pingaaruteqarpoq. Sisorarfimmi aput qanoq ippa, sioqqullutit inuit qassit sisusimappat sisuleruillu aput qanoq manngertigaa? Tamakku kiisalu tarnikkut nukittussuseq unamminerup inerneranut pingaaruteqaqaat, Nuunu nassuiaavoq, nangillunilu:
- Siornatigut unamminissaq sioqqullugu ”qerisutut” misigisimangajattarpunga, taamaammat sungiusaasortaaralu tarnikkut piareersarnissaq aallutingaatsiarnikuuarput. Unamminissanut aggersunut piareersimanerusutut misigisimavunga.
Sisorarluni sangusaartartoq juullimi angerlarnavianngilaq OL-imut anngunnissaminut ulapputeqartussaavoq. Ukiuunerani OL Beijingimi februaarip sisamaani aallartissapput.