Nuunu OL-eqataanissaminut periarfissaqarpoq

25-nik ukiulik sangusaartartoq Nuummeersoq, Nuunu Chemnitz Berthelsen nunat assigiinngitsut peqataaffigisaannik unamminerni peqataassaaq qaammatini tulliuttuni.

Ukiuunerani OL-ertoqarnissaanut, Beijingimi februaarip sisamaani aappaagu pisussami, peqaataanissani siunnerfigaa.

- Ingerlalluarpunga, nukittuneruvunga, taamaattumik anngunnissamut piumasaqaatit angunissaat isumalluarfigaakka. Sangusaarnermi susoqarsinnaavorluunniit, taamaattoq neriulluarpunga, tassami unamminerni sungiusarnernilu ingerlalluarpunga, Sermitsiaq.AG-mut oqarpoq.

Inissaq ataaseq

Nuunu Chemnitz Berthelsen unammisartut sisamat allat peqatigalugit OL-eqataanissamut piumasaqaatit anguniarsarai. Unammeqatimini piumasaqaataasut maanna kisiartaalluni angunikuuai. Punktit 54-it ataallugit kisiartaalluni piumasaqaataasut angunikuuai, taakkuuppullu OL-eqataanissamut piumasaqaataasut.

Punktit tassaapput ajugaasumit qanoq sivisutigisumik kingulliunerluni pissarsiarineqartartut. Taakku aallaavigalugit pointilersuisoqartarpoq. Ajugaasumit sekundimik ataatsimik kingulliugaanni punktinik arfineq pingasunik pinnattoqartarpoq. Punktit pissarsiarineqartut ikinnerunissaat anguniarneqartarpoq.

Piumasaqaatit anguneqartussat

Nuunu Chemnitz Berthelsen OL-eqataassaguni piumasaqaataasut marluk angusariaqarpai.

1. Nunat tamalaat unammersuaarnerini FIS-inik taaneqartartuni agguaqatigiisillugu 54 pointinnannissaq

2. World Cupimi imaluunniit European Cup-imi sisamariarluni peqataanermi, unammeqataanerni taakkunani marlunni agguaqatigiisillugu 105 punktit ataallugit.

- Marloriarlunga World Cup-imi peqataareerpunga kiisalu European Cup-imi aamma peqataanikuullunga. Taakkunani ataaseriarlunga 105 punktit ataallugit angusaqarpunga, oqaluttuarpoq.

European Cup-imi unammeqataarngaassaaq ukioq manna, tassani Duved-imi Sverigemi novembarip 25-ani 26-anilu peqataassalluni. Tassani ataaseriarluni 105 punktit ataattariaqarpai.

- Piumasaqaataasut aappaat tassani angusinnaavara. Tassanngaanniit nunat tamalaat unamminerannut akuerisaasunut FIS-inut unamminernut peqataassaanga. Novembarimi, decembarimi januarimilu unammeqattaassaanga. OL-imut piumasaqaataasut januarip 14-ani 2022-mi angoreerneqartussaapput, sangusaartartoq nassuiaavoq.

Unammeqattaarnissanut qilanaarpoq

Nuunu Chemnitz Berthelsen aatsaat taama sukkatigaluni misigaaq, timikkut tarnikkullu aatsaat taama nukittutigaluni malugalugu.

- Unammisaqattaarnissanut aatsaat taama qilanaartigaanga. Sisorarneq nuannareqaara. OL-imut anngukkaluaruma anngunngikkaluarumaluunniit malugisinnaavara aatsaat taama angusarissaartigissallunga. Aningaasatigut tapersersortinnut kiisalu ajoqquseqqasimaninnut tapersersuisunut qujarusuppunga. Nunatsinnit taamatut kaammattorneqarneq isumaqartorujussuuvoq. Unammerusussuseqalersitsinermik tunisivoq taamatut tapersersuillutik uannut nalunaartartut, Nuunu Chemnitz Berthelsen oqarpoq.

Ujakkaartartoq Martin Møller aamma frestylerluni sisorartartoq Laila Friis-Salling ukiuunerani OL-ertoqarnerani kingullermi peqataapput. Sisoraaserluni ooqattaasartartoq Ukaleq Slettemark, Nuunu Chemnitz Berthelsenisut, ukiuunerani OL-eqataanissamut siunnertaqarluni unammisaqattaassaaq piffissami aggersumi.