Nuunu Chemnitz Berthelsen DR-imi Horisontimi peqataassaaq
Nuunu Chemnitz Berthelsen, Norditaliamiitsilluni coronavirusimik tunillatsissimasoq, maannali peqqissereersoq, DR-ip aallakaatittagaani Horisontimi unnugu aallakaatinneqartussami peqataassaaq.
Sisorartartoq, Italiap avaannaani najugaqartoq, martsip qaammataani paasivaa coronavirusimik tunillatsissimalluni. Akunnittarfimmi, sisorartartut allat tallimat peqatigalugit najugaqarfigisaani, igasup tunillassimavaa.
Nuunu Chemnitz Berthelsen DR-ip aallakaatittagaani Horisontimi unnugu peqataassaaq. Dr.dk taama allappoq.
Horisont danskit nalunaaqutaat malillugu nalunaaqutaq 21.25 Dr 1-imi DRTV-milu aallartissaaq. Aallakaatitsereernerup kingorna Nuunu Chemnitz Berthelsen dr.dk-mi apeqquteqarfigineqarnissaminut piareersimassaaq.
Aallakaatitassiaq kalaallit nalunaaqutaat malillugu nalunaaqutaq 17.25 aallartissaaq.
Sisorartartup Horisontimi peqataanermini napparsimasimanini oqaluttuarissavaa, aammali nunatsinnut nappaatip nassartooratarsinnaaneranik ernumassuteqarsimaneq oqaasertalissallugu.