Nuummut utiinnartariaqartoq: Aappaa sinerissami suliffissaqanngilaq

Ilaqutariinnut Nuummit sinerissamut nuunnissaq imaannaatsuinnaanngilaq, aappariit marluullutik suliffissaqassappata.

Tamanns ilaqutariinnik oqaluttuami takuneqarsinnaavoq, tassa aappariit marluullutik ilinniarluarsimasuullutik, Nuummilu najugaqarlutillu suliffeqarlutik, sinerissamulli nuukkusukkaluartuni.

Oqaluttuaallu oqallinnermut nutaanik saqqummiussivoq, qanittukkut borgmesterit Siumumeersut pingasut sinnersuutigereeraallu pisortani suliffiit 600-t Nuummit sinerissamut nuunneqassasut.

Periarfissaq nutaaq

Aappariit kinaassusertik isertuukkusppaat, aaqqissuisoqarfiulli kikkuuneri nalunngilai.

Uia Ilulissaneersuuvoq, nulia Nuummi inunngorlunilu peroriartorsimalluni. Aappariit inersimalereersunik qitornaqarput, ukiullu marlussuit matuma siornatigut taakkua efterskolertussanngormata illoqarfissuarmit nuunnissaminnik sinnattortik piviusunngortinniarpaat, aappariit ilinniagaqarnermik kingorna Nuummi najugaqaannarsimagamik.

Ilulissat

Siullermik uia Ilulissani suliffittaarpoq. Nuliali suliffissarsiuminaatsitsivoq. Taanna suliffissaqaleriaruni malinnaasussaagaluarpoq.

– Qinnuteqaqattaartarsimavunga, aamma Ilulissani atorfinnut inuttaqanngitsunut, suliffittaanngisaannarpungali. Aamma atorfinnut atorfigisinnaasannit piumasaqaatikinnerusuni. Naggataatigut tunniutiinnarpugut, nuliaasoq nassuiaavoq.

Qaqortoq

Ukiut aappaata affaani Ilulissaneereerluni uia Qaqortumut nuuppoq tassani nutaamik suliffittaarami. Misigisarli aamma taamaattooqippoq. Nulia suliffissaqanngilaq. Ukiorlu ataaseq qaangiummat sinerissamut nuunniarnertik taamaatiinnarpaat, uialu Nuummut utiinnarpoq.

Kommuni qanoq iliorsinnaava?

Tamatumunngalu atatillugu aappartiit akissuteqarfigeqquvaat kommunit qanoq iliorsinnaanersut ilaqutariit, ullumikkut sinerissamut nuukkusuttut, tikilluaqqulluarneqarnissaannut, assersuutigalugu aapparisap suliffissarsiornerani ikiorneqarsinnaaneranut.