Nuummiut: Qamittoornissamut sillimasut
Mobiilit Ipad-it saffalersorluarnikut imeq qalannikoq nillorneq ajortunut ikuisat, tassa Nuummi innuttaasut ilai anorersuanngilaataani qamittoornissamut sillimaniarnermut piareersimatitaasa ilaat.
Nuummi nunattalu sineriaani siallerlunilu anorlerpoq. Anorersuaq sekundimut 40 meterit tikillugit anoraasuartartumik anorersuarnissaanik DMI aarlerisaarivoq. Oqartussat innuttaasut angerlarsimanissaanik kaammattuuteqarnikuupput politiillu suliffeqarfinnut innuttaasunullu pigisanut isumannaarsuinissaat kajumissaarutiginikuuaat.
Nuummi innuttaasut qamittoorneq novembarimi pisimasoq aarlerisorujussuuaat. Qamittoorneq sivisoorujussuup imeqannginnermik internetteqannginnermillu kinguneqartitsivoq. Taamaammat innuttaasut arlaqartut qamittoornissamut sillimaniarlutik piareersisarsimapput. Ulla Sievertsen piareersarsimasunut ilaavoq.
- Puujaasat suulluunniit immerneqarsinnaasut immerneqarput, mobiilit ipad-it tamarmik sarfalersorpakka. Filmerpassuarnillu aallerlunga. Imermik qalatitsereerpunga nillornerlu ajortunut kuerarlugit. Qulleeqqat LED-it arlaanik aalasattoqaraangat ikittartut sinittarfimmut, anartarfimmut, inimut, torsuusamut sumut tamaanga ilioraavunga. Tamakkuninnga allaat tassa piareersimasuutigivakka, Ulla Sievertsen illarluni oqarpoq. Taanna ullaap tungaa qamittoornissamut sillimaniarluni ulapissimavoq.
Ulla kisiartaalluni qamittoornissamut sillimaniarluni piareersanngilaq. Nuummi innuttaasut arlallit Facebook aqqutigalugu qamittoornissamut piareersarsimallutik allapput.
- Piareersanngiivissoraluarama. Ippassaq Facebookimi allattoqarsimagami ‘Suloraq qameqaaq’ – nalaattornerinnakkut takugakku. Tupannermik høretelefonikka ateriarlugit mobiilera immiutaa allallu immertariallit ikkussuutipallappakka. Ipad-igalu immiutaa filminik aallipallallunga. Taassuma saniatigut erruivunga imeerusasoraluta, Paaliit Mølgaard illarluni taama Sermitsiaq.AG-imut oqarpoq.
Taanna aamma oqaluttuarpoq anartarfimmut imermik spandimi piareersimasuuteqarluni. Kingullermik anorersuarnerani Nuuk qamittoormat tiimerpassuarni inigisamini imeqarsimanngimmat.
Suli innaallagiaq qaminngilaq
Suli sila qatsunngikkaluartoq suli innaallagiaq qamittuunngilaq. Unnuap ingerlanerani Qinngorpumi stillads-it uppipput illoqarfiullu qeqqani aqqusinermi qulleq aserorluni.
Qamittoortoqassagaluarpat Ulla Sievertsenip primusi taamaallaat kaffiliornissaminut amigaatigaa.
- Uiga Orsiivimmi sulisarami assut eqqarsaatigaara primusitissanerlugu ullunut ajornernut, Ulla Sievertsen illarluni oqaluttuarpoq.
Nuummi najugallit nillorneq ajortunik immiisimallutik qaammartartunik piareersimasuuteqarlutik assinik ikkussuisimapput. Paaliit Mølgaardip taamani Nuuk qamittuullarmat nuannersutut eqqaamavaa, taamaakkaluartorli imeqannginneq unammillernarsimalluni.
- Suullu tamaasa imermik immersinnaasut immerpakka nillataartitsivimmullu ikioraallunga. Errueriarama – errugassat qiviallataakkakka imaallaat aamma piareerpakka. Errugassaqannginniassagamalu naatitanik ullaakkut atugassakka aggoreerlunga, Paaliit illarluni oqarpoq.
DMI-p silassamik ilimasaarutaa naapertorlugu unnuap qeqqata missaani qatsoriartulissaaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...