Nuummiu qimuttuitsuni ajutoortuni ajunaartoq

Storebæltimi qimuttuitsunik ajutoortoqarmatn ajunaartut ilagaat 30-nik ukiulik Kasper Brix Bærndt.

Qatanngutaasoq, Karoline Dahrling Hughes Facebook-imini ima allappoq:

- 2019 ajorluinnartumik aallartippoq. Qatanngutiga, Kasper Brix Bærndt qimuttuitsuni ajutoornermi sakkortungaartumik uagutsinniit tiguneqarpoq. Ilaqutaasugut tamatta attorneqarpugut, maqaaseqaagullu. Naapertuilluarnerunngitsutut misiginarpoq, uppernaappoq, ajutoornerlu pinngitsoorsinnaasutut misiginarluni. Qatanngutiga annaavara, meeraaqatiga, nakuusoq, pinnersoq, angut pikkorissoq, ikinngutigillualersimasara, qatanngutaasoq facebookimini allappoq, taanna ilisimatitsivoq Kasper Kalaallit Nunaanniit Jyllandimut ukiumi nutaami utissalluni pilersaaruteqarsimagaluartoq.

- Asasasi najornerani naleqartillugit takutittarsiuk. Asaneqartut takutittarsiuk, paarisinnaaneranilu paarilluarsigit. Asasara Kasper, eqqaamavatsigit. Qaqugumut, Karoline Dharling Hughes allappoq.

Crossfitertartoq

Kasper Crossfit Inua aqqutigalugu ikinnguterpassuaqalersimavoq, timersortartuulluartututullu nalilerneqarsimalluni.

- Alianaqisumik paasitinneqarpugut Kasper Brix Bærndt Danmarkimi qimuttuitsunik ajutoortoqarnerani ajunaarsimasoq, CrossFit Inua facebookimini allappoq.

- Kasper Inuami ilisarisimavarput, Crossfitteriuvorlu pikkorissoq nuannarineqartorlu, ajunngilluinnartumik ingerlasimasoq. Kasperp najuunnera CrossFit Inuami maqaasissavarput Kasperllu ilaqutaanut ikinngutaanullu misiginneqatiginnissupput apuukkumavarput, allassimavoq.

Hjørringimeersoq

Kasper Brix Bærndt Nordjyllandimi Hjørringimeersuuvoq. Taanna Nuummut 2016-imi nuuppoq, peqqissutsimullu naalakkersuisoqarfimmi atorfeqarluni.