Topkarakter
Nuummioq tunuarsimaartoq 12-innappoq
Suli atorfeqanngilaq, Kristian Aagaard Jørgensenimullu Nuummeersumut silarsuaq ammavoq
Kristian Aagaard Jørgensen, 24-nik ukiulik, Nuummeersoq Aalborg Universitetimi TI-ledelse-mi kandidat-itut ilinniakkaminik naammassinneqqammerpoq. Apersorneqarnermi assilineqarnermilu kingorna ataasiinnaq amigaatigaa - soraarummeerummini karakteria. Sianernerup kingorna Kristian Aagaard Jørgensen aperineqarpoq soraarummeerummini karakteria tikinneqarsinnaanersoq:
– Ilaana - naggataarutaasumik suliannut 12-innappunga, taannalu ateqarpoq "ERP-implementering i den offentlige sektor" (ERF = Enterprise Resource Planning, aaqqiss.).
Kristian Nuummi inunngortsimavoq angajoqqaaralugit Birgit aamma Leif Aagaard. Tassani GU-mi atuarpoq. Tamatuma kingorna Aalborg Universitetimi ukiuni pingasuni ilinniareerluni erhvervsøkonomi-mi bachelor-inngorpoq, maanna ukiuni marlunni IT-ledelse ilinniarfigisimavaa, tamatumanilu sammineqartarput IT-teknologi-nik atuinermi ineriartortitsineq aaqqissuussinerlu.
Kristian suli atorfininngilaq soqutiginnittunillu tusarusulluni, aamma Nunatsinnit. Danmarkimi Norgemilu IT-konsulentitut periarfissat misissorsimavai, sulili aalajangiussaqarsimanngilaq.
Kristianip ilinniagaqarnermini aamma pingaartissimavaa kalaallinik allanik Aalborgimi ilinniagaqartunik attaveqartarnini, JAKIP-imi aningaaserisuusimavoq maannalu Aalborgimi AVALAK-mi aningaaserisuulluni. Ukiup affaa kingulleq Aalborgimi Arctic Business Network-imi studentermedhjælperitut sulisimavoq.