umiarsualivik
Nuummi umiarsualiviup akigititaq akerleriissutaasoq allangortippaa
Nuummi umiarsualivimmi tunisinermi umiarsuarnut akigititaq peerneqassaaq, tamatuma saniatigut akiliisarnermut systemi nutaaq eqqunneqarpoq.
Aalisariutit minnerusut Sikuki Nuuk Harbour A/S-imut aalisakkanik tunisisarnera akikinnerulaalissaaq. Tassami arfininngorneq apriilip 15-at aallarnerfigalugu umiarsuarliviup tunitsivimmut akiliutigitittagaanut umiarsuarnut akigititamut akiliisarunnaassapput.
- Aalisartunut minnernut akikinnerulissaaq, tunisigaangamik umiarsuarnut akigititamut akiliisarunnaarnissartik pissutigalugu, John Rasmussen, Sikukimi pisortaq oqarpoq. Nioqqutissanulli suli akiliuteqartoqartassaaq.
Taanna umiarsualivimmi suleriaasissatut tunngavinni nutaani allannguutit annerit ilagaat.
Atuinermut akiliut aalajangersimasumik akiliuteqarfinngorlugu
Allannguutit allat ilagissavaat, tulattarfinni Kutterkajimi, Trawlerkajimi aammalu Monteringskajimi umiarsuit atuinermut akiliinissaat allanngortinneqarpoq ilaasortaasutut aalajangersimasumik akiliisitsisoqartalersitsineq.
- Maannamut atuisut akiliuteqartittarlugit aaqqiissuteqarsimagaluarput, tassani tulannermut akiliisoqartarpoq. Kisianni tamanna nakkutigissallugu ajornarpallaarsimavoq, John Rasmussen oqarpoq.
Aalajangersimasumik akiliuteqartarneq ukiup affaanut atuuttassaq.
Akigititaq qaffanneqassaaq
Aalisakkanik qalerualinnillu niusinermut akigititap qaffanneqarnissaa umiarsualivimmi suleriaasissatut tunngavinni allannguutit ilaanni aamma taaneqarsinnaavoq. Tamatuma saniatigut eqqakkanik passussinermut malittarisassat pisariinnerulissapput.
Suleriaasissatut tunngavissat allannguutaat uani ataatsimut takuneqarsinnaapput