Nuummi tunillatsissimasut nutaat aqqaneq-marluk - bussi akiuussutissalersuiffissaq misissuisarfiup eqqaanut inissineqarsimavoq
Nuummi miisissortissimasut to procentii tunillatsissimapput. Danmarkimut sanilliukkaanni, Danmarkimi misissortissimasut 0.96 procentii tunnilatsimasuupput. Inuit unitsinneqarsimasut marluusut aappaa angerlartinneqarsimavoq.
Tallimanngornermi Nuummi misissortissimasunit 600-t missaanniittunit aqqaneq-marluk tunillatsissimapput, tassa misissortissimasut 2.0%-ii tunillatsissimallutik.
Pingasunngornermut sanilliullugu sisamanngormat ikinnerusut misissortissimapput, misissortittartulli amerliartorput.
Danmarkimi tallimanngornermi 39.641-t PCR-mik misissorneqarsimasut 0,96 procentii tunillatsissimapput, sisamanngornermi 0,71 procentiusimallutik.
Misissuisarfiup illoqarfiup qeqqaniittup silataani tupeq misissortiniarlutik utaqqisut oqquisimaarfigalugulu kissasserfissaat napparneqarsimavoq. Peqqissutsimut Naalakkersuisoqarfimmi pisortaagallartoq Aka Olsen Sermitsiaq.AG-mut ilisimatitsivoq.
- Misissuisarfiup ininut naleqqunnerusunut nuunneqarnissaa sulissutigaarput, Inussivilli maannakkorpiaq allanut atorneqarmat unammilligassaqarpugut.
Bussi akiuussutissalersuisarfik tuperlu oqquisimaarfik
Naalakkersuisoqarfimmit oqaatigineqarsinnaanngikkallarpoq, misissuisarfik qaqugu nuunneqassanersoq.
- Tulleriiaattorpassuusartut silallu nillernerulernera nalunngilarput. Taamaammat ininut allanut nuussitinnata pitsaanerpaat tulliatut iliuuserisinnaasarput tassaavoq, oqquisimaartarfissamik kissasserfissamillu pilersitsinissarput, Aka Olsen oqarpoq.
Misissuisarfiup eqqaani tupermik nappaanerup saniatigut bussimik inissiisoqarsimavoq. Tassani piffissamik inniminneeqqaanngikkaluarluni akiuussutissalertittoqarsinnaavoq.
Nunatsinni Nakorsaaneqarfiup nun.gl-ikkut ilisimatitsissutigaa, ullormi kingullermi tunillatsissimasut amerlanersaat tunillatsissimasutut ilisimaneqartunut attaveqarsimasuusut.
- Nutaanilli tunillatsittoqartarpoq tunillaassuisutut ilisimaneqanngitsunit tunillatsissimasunik.
Assigiinngitsutigut ukioqatigiikkuutaat tunillatsittartut
Assigiinngitsutigut ukioqatigiikkuutaat akornanni tunillatsittartut amerliartorput. 14-inik ukiullit marluk tunillatsissimapput, aamma 18-it 29-llu akornanni ukiullit marluk, 30-t 49llu akornanni arfineq-marluk kiisalu 50-it sinnerlugit ukiulik ataaseq tunillatsissimallutik.
Danmarkimi Styrelse for Patientsikkerhedimit ilisimatitsissutigineqarsimavoq, Nuummiit Kangerlussuarmut, Kangerlussuarmiillu nunamut allamut timmisartorsimasoq ataaseq tunillatsissimasoq paasineqarsimasoq. Ilaasimasoq pineqartoq GL558-imut ilaalluni ulloq 21-september 2021 Nuummiit nal. 14:15 aallarsimavoq. Tassunga ilaasimasut suli nunatsinniittut misissortinnissamut kaammattorneqarput.
Tunillatsissimasunik uninngasuerussimavoq.