Nuummi tunillatsissimasut nutaat 13-it

Illoqarfiit pingaarnersaanni misissukkat 800-t akornanni 13-it nutaat tunillatsissimasut paasineqarput. Danmarkimut angalasoq aamma tunillatsissimasoq paasineqarpoq, angalaqataasimasullu suli nunatsinniittut misissorneqarnissamik kaammattorneqarput.

Nuummi tunillatsissimasut nutaat 13-it sisamanngornermi paasineqarput. Misissuinerit 800-t missaannit taakku paasineqarput, tassa misissukkat 1,6 procentii tunillatsissimasuullutik.

Nunap sinnerani tunillatsissimasunik nutaanik paasisaqartoqanngilaq. Kommuneqarfik Sermersooq 135-inik aamma Qeqqata Kommunia arfineq-pingasunik maanna tunillatsissimasoqarput.

- Tunillaassuuttoqalerneraniilli Nuummi tunillatsissimasut katillugit 260-iupput, tassa innuttaasut 1,4 procentii maanna tunillatsissimareerlutik, nunatta nakorsaaneqarfia tunillatsissimasut nutaat ullumi saqqummiunnerini ilisimatitsivoq.

- Tunillatsissimasut nutaat amerlanerit tunillatsissimareersunut attaveqartuusimapput. Sulili tunillatsissimasunut ilisimaneqartunut attaveqarsimanngikkaluartulluunniit tunillatsissimasut nutaat paasisarpagut.

Nuummi coronamut akiuussutissalertissimanermut piumasaqaatip saniatigut killilersuutinik allanik atuutsitsisoqalernissamik pilersaaruteqartoqanngilaq.

Angalasoq tunillatsissimasoq

Nunatta nakorsaaneqarfia ilanngullugu ilisimatitsivoq tunillatsissimasoq Nuummut attuumassuteqartoq Danmarkimi paasineqarsimasoq. Taanna Nuummiit Kangerlussuamut GL502-mut ilaalluni ataasinngormat 20. september nal. 07.45 aallarluni angalavoq.

- Angalasut amerlanerpaartaat nunatsinnit aallarsimassapput. Tassanili ilaasimasut suli nunatsinniikkunik misissortinnissaat kaammattuutigaarput, oqartussat ilisimatitsipput.

Powered by Labrador CMS