Skip to main content

Nuummi tunillatsisimasut pingasunik ilaqqittut

Nuummi tunillatsissimasut pingasunik ilaqqimmata, tunillatsissimasut katillutik maanna qulingiluanngorput, taakkunanngali marluk peqqisseqqereerput.

Ullumi tusagassiortunik katersortitsinermi ilisimatitsissutigineqarpoq, Statens Serum Institutimi misissukkanit 32-usunit pingasut tunillatsissimasut.

Nunatsinni Nakorsaaneq Henrik L. Hansen ullup ataatsip ingerlanerinnaani tunillatsissimasut aatsaat taamak amerlatigisut pillugit ima oqapoq:

- Nunarsuarmi pisoq Kalaallit Nunaanni maani aamma atuunniarsarilersoq paasivarput. Qujanartumik avataanit tikissimasoq matumani pineqarpoq. Tunillatsissimasut nutaat taakku pingasut ilaqutariipput. Ilaqutariit angerlarsimaffimminni imminnut mattusimasimapput, pasitsassaqanngilagullu tuniluunnerup siaruaateqqissimaneranik, nunatsinni nakorsaaneq oqarpoq.

Nunatsinni Nakorsaaneq tunillatsissimanngitsoq

- Nunatsinni Nakorsaaneqarfimmi misissugassatut tigusimasavut, uanga ilanngullunga, tamarmik ajunngillat. Tassungali atatillugu tamatta pisimasut marluk ilinniarfigisariaqarpavut. Kukkussutigisimavara, taamani oqarasuaat akeqanngitsumik sianerfigineqarsinnaasoq atuutsinnialeratsigu inuit amerlavallaat Nakorsaaneqarfimmut isertitsimangakkit. Tamanna sianiilliorneruvoq. Taamatut kukkussuteqarnaveersaaritsi, nunatsinni nakorsaaneq erseqqissaavoq.

- Aappaa pingaaruteqartoq paasissallugu tassaavoq: Misissugaq nappaateqalersimanermik takussutissaqanngikkaluartoq, tunillatsissimanermit ullut 14-it ingerlaneranni napparsimalertoqarsinnaanera. Pingaaruteqarluinnarpoq, misissugassanik tigusiffigitissimasorpassuit angerlarsimaffimminni imminnut sapaatip akunnerini malunni mattussimanissaat, nunatsinni nakorsaaneq oqarpoq.

- Misissugaq nappaateqarnermik takussutissaqanngikkaluartoq, kingusinnerusukkut napparsimalertoqarsinnaavoq. Taamaammat uanga suleqatikkalu ullut 14-it qaangiutsinnagit Namminersorlutik Oqartussat allaffeqarfissuanni takussaassanngilagut, nunatsinni nakorsaaneq oqarpoq.

SMS-ikkut kiffartuussissut nutaaq

Politimesterip Bjørn Tegner Bayp ilisimatitsissutigaa, suliniut nutaaq atuutsinneqalissasoq, tassa Kalaallit Nunaanni innuttaasunut tamanut ataatsikkut SMS-imik nassiussisinnaaneq. Taamaaliorput attaveqaqatigiinneq pitsanngorsaaffiginiarlugu, tamannalu Tele Greenland suleqatigalugu pisimavoq.

- Ungasinngitsukkut inuulluaaqummik nassitsinnissarsi eqqumaffigisiuk. Pisut pingaarutillit innuttaasunut ilisimatitsissutiginiaraangatsigit sakkusssaq taanna pisariaqartipparput. Neriuppunga suliniut taanna tigulluassagissi, politimesteri oqarpoq.

Tusagassiortut katersorneqarneranni SMS siulleq takkuppoq, kalaallisut, danskisut tuluttullu imatut allassimasut:

Asasatit mianerikkit!

Allat qanillinaveersaakkit, assatillu akulikitsumik errortakkit.

Taava ALLANNGUEQATAASSAATIT.

Ataatsimoorlut Kalaallit Nunaanni coronavirusi akiorparput!

Inussiarnersumik inuulluaqqusilluta Naalakkersuisut, Nunatsinni Nakorsaaneqarfik Kalaallillu Nunaanni Politiit.

Paasissutissiisarnissamik suliniut nutaaq taanna pillugu politiit tusagassiorfinnut nalunaaruteqarnerminni ilisimatitsissutigaat:

- Politiit innuttaasunut qanimut sukkasuumik ingerlaavartumillu atassuteqartuarput, ujaasinerniit annertuumik pinerlunnernut pineqaraangata. Taamaammat SMSimik nassitsisarneq Kalaallit Nunaata Politiivini, oqartussaasuni ataqatigiissaarisuusuni, aqunneqassaaq:

- Suliuaannarpugut, ulloq unnuarlu nuna tamakkerlugu malinnaajuarpugut pilertortumillu qisuariarsinnaalluta – taamaattumik upalungaarsimanermi SMSimik nassitsisarnerup politiinut tunniunneqarnera pissusissamisuuginnarpoq, politimester Bjørn Tegner Bay oqarpoq.

- Innuttaasut nassittaqattaarnissaat anguniagaanngilaq, immikkulli illuinnartunik pisoqaraangat atorneqartarumaarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER