Nuummi timmisartoqarfiliorneq ingerlalluartoq
Nuummi timmisartoqarfiliorneq ingerlalluarpoq, maanna mittarfiusoq atorunnaarsinneqassaaq. Kalaallit Airportsip kvartalip aappaani qaartiterinissamut pilersaarutaani nutaami tamana atuarneqarsinnaavoq.
Nuummi timmisartoqarfiliorneq immikkoortunut arfinilinnut avitaavoq, nunaminertallu kujasinnerusortaani qaartiterisoqarnerussalluni. Ilisimatitsissutigineqarporli Siaqqinnermi aqquserniornissamut atatillugu aamma qaartiterisoqassasoq.
Kujasinnerusortaani mittarfiliorneq ingerlalluarmat, ukioq manna juulip qaammataani immikkoortup aappaata aallartinneqarnissaa naatsorsuutigineqarpoq.
Tassa mittarfiup ingerlanneqarnera mittarfiup affaanut nutaamut nuunneqassaaq, mittarfik pioreersoq atorunnaarsinneqassaaq aammalu mittarfiup nutaap avannarpasinnerusortaa sananeqassalluni.
Nuummi qaartiterinissamut pilersaarut takuuk
Ilulissani qaqqaq qaartinneqassaaq, tassani suliassap sumiiffianut sanaartornermi aqqusinissamik sananissaq kiisalu timmisartoqarfiup illutassaata inissaata qaartiterneqarnissaa siunertarineqarluni. Ilanngullugu ilisimatitsissutigineqarpoq, qillerinerit ataasinngornermiit arfininngornermut ulloq unnuarlu ingerlanneqartassasut, pisariaqassappallu sapaammi aamma qillerisoqartassasoq.
Ilulissani qaartiterinissamut pilersaarut takuuk