Skip to main content

Nuummi Timersortarfik Illorsuup allineqarnissaa oqaluuserineqartoq

Nuummi Timersortarfik Illorsuup nutarterneqarnissaanut allineqarnissaanullu periarfissat arfininngornermi seminarertoqarnerani soqutigisaqartut assigiinngitsunit atuisuniillu oqaluuserineqarput.

Illoqarfiit pingaarnersaat Nuuk sukkasuumik alliartorpoq, innuttaasullu amerlartorlutik. Illoqarfiullu timersortarfia, Nuummi Timersortarfik Illorsuaq, timersortartunut aamma timersuutinut amerliartortunut mikivallaalerpoq.

Timersortarfiup siulersuisuini siulittaasoq, Hans Boassen, Sermitsiaq.AG-mut taama oqaluttuarpoq.

Atuisut amerlanerusut

- Timersortarfimmik atuisut amerliartuinnarput. Timersortartunut timersuutinullu amerliartuinnartunut, futsal aamma floorball timersortarfiup atorneqarnissaanut kissaatit tamaasa naammassiniarnissaat ajornakusoortipparput, Hans Boassen oqarpoq.

Nuummi Timersortarfik Illorsuup nutarterlugulu allineqarnissaa siulersuisut Timersortarfimmik Kulturikkullu Illorsuarmik nutaarluinnarmik pilersitsinissamut periarfissaq ukiuni kingullerni sulissutigisimavaat.

Timersortarfiup ingerlatsisuisa taamaattumik soqutigisaqarsinnaasut aamma atuisunngorsinnaasut kiisalu Nuummi timersoqartigiiffiit, sammisat suut aamma atuisut kikkuussaneri isumassarsiffiginiarlugit paasiniaaffiginiarlugit, arfininngormat seminarimut qaaqqusimavaat.

Ilisimasallik marluk

Seminarertoqarnissaanut timersortarfik siunnersortinik marlunnik ataatsimiinnermik ingerlatsisussanik siunnersorteqarput, tassa Danmarkimi Lokale og Anlægsfondenimi pisortaasimasoq Carsten Haurum aamma suliffeqarfimmik aningaasaliisussarsiortartumik Up Front Europemit piginnittoq Lotte Jensen.

- Peqataasut eqimattanut agguataarneqarput, taakkulu sammisassanut nutaanut pisariaqartinneqartut aamma atuisussallu nutaat inissaqartissinnaasassaat oqaluuserineqarlutik, Hans Boassen oqaluttuarpoq.

Arfininngornermi seminarertoqarnerani peqataasut 40 missaanniittut taanna ilisimatitsivoq.

Suliniut nutaajunngitsoq

Timersortarfiup allineqarnissaanut suliniut nutaajunngilaq, siullermik 1996-imi Arctic Winter Games 2002-mut piareersartoqarneranut atatillugu aallartinneqaarpoq. Kisianni taamanikkut Inussiviup sanaartorneqarnissaa aalajangiunneqarpoq, timersortarfillu allineqarani.

Nuup sukkasuumik ineriartorneranut atatillugu timersortartunut amerliartuinnartunut illunik nutaalianik pisariaqartitsisoqartoq, timersortarfiup ingerlatsisui isumaqaramik suliniut qaqeqqippaat.

Nuummi Timersortarfik Illorsuup sukuutsertarfiusimasup timersortarfiup eqqaaniittup tungaanut allineqarnissaa ilaatigut takorluugaavoq, aamma timersoqatigiiffiit kattuffii assigiinngitsut allaffeqartinneqarsinnaassallutik.

Alloriarneq tulleq

Maanna siunnersortit marluk Carsten Haurum aamma Lotte Jensen seminarimit imaqarniliussapput, tamatumalu kingorna suliniutip ingerlateqqinnissaa oqaluuserineqassalluni.

Seminarertoqarnerani aamma Timersortarfiup nutarterneqarnissaanutallineqarnissaanullu Kommuneqarfik Sermersuup takorluugai kissaataalu Nuummi illoqarfik pillugu periaasissaq tunuliaqutigalugu saqqummiunneqarput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER