Nuummi Sisimiunilu tunillatsissimasut nutaat arfineq-marluk

Marlunngormat Nuummi sumiiffinni arlalinni kimit tunillanneqarsimanerannik ilisimaneqanngitsunik tunillatsittoqarsimavoq. Paaqqinnittarfik ataaseq matuneqarsimavoq Majoriamilu klassimi atuartut angerlartinneqarsimallutik. Ataasinngormamiit tunillatsissimasut nutaat arfineq-marluk paasineqarsimapput.

Ullormi kingullermi Kalaallit Nunanni Coronavirusimik tunillatsissimasut arfineq-marluk paasineqarput. Taakkunannga sisamat Sisimiuni pingasullu Nuummi paasineqarsimallutik.

Nuummi Majoriami klassimi atuartut angerlartinneqarsimapput, atuartut ilaat tunillatsissimammat misissortinnissamut kaammattorneqarsimallutik.

Nuummi kikkut tunillaassuinersut ilisimaneqanngitsoq

Ulluunerani paaqqinnittarfimmi Timmiaaqqani meeraq ataaseq sulisorlu ataaseq tunillatsissimapput. Taamaammat paaqqinnittarfik matoqqatinneqarpoq, tassa meeqqat sulisullu misissorneqarneranni.

Kommuneqarfik Sermersuumi Meeqqanut Atuarfeqarnermullu Ingerlatsiviup Coronamut allattoqarfik suleqatigalugu matusisimaneq sivitsorneqassanersoq isummerfigissavaa.

Nuummi tunillatsissimasut imminnut attuumassuteqanngillat, taamaamma kimit tunillanneqarsimanersut ilisimaneqarani.

Inuppassuit misissorteqquneqarsimanerat pissutigalugu, Nuummi misissuisarfik ullumi aqangulu ualikkut marluk tungaanut immikkut ammatinneqassaaq.

Sisimiuni tunillatsissimasut sisamat tunillatsissimasutut ilisimaneqareersuni tunillanneqarsimapput.

Powered by Labrador CMS