Nuummi sineriammut qanittumi aalisartut akikillisaaffigineqartut - umiarsuarnik takornariartartut akitsuuserneqarput
Sikuki Naalakkersuisunik oqaloqateqareerluni, sineriammut qanittumi aalisartut umiarsualivimmik atuinerannut akiliutigisartagaannik appaavoq. Tamatuma saniatigut akitsuutinik nutaanik atuutsitsisoqalerpoq - tassunga ilanngullugu Umiarsuarnut sinersorlutik takornariartitsisartunut ilaasumut ataatsimut 2023-mi januaarip aallaqqaataaniit 10 koruunimik akiliuteqartitsisoqartalissalluni.
Nuummi sineriammut qanittumi aalisartut piffissami sivisuumi naammagittaalliuuteqartarsimaput. Aalisartut umiarsualivimmik atuinerminni Sikuki Nuuk Harbourimut akitsuummik akiliuteqartinneqartarnertik naammagittaalliuutigisarsimavaat.
Aalisartut maanna Naalakkersuisut akuliunnerisigut akikillisaaffigineqarput. Attaveqaasersuutinut Naalakkersuisoq Erik Jensen (S) tusagassiorfitsigut nalunaaruteqarluni taamatut ilisimatitsissuteqarpoq.
Tassa alisakkat qaleruallillu nutaat sikulersukkallu, sinerissamut qanittumi aalisarnermi pisat, ullumikkut ton-imut 38,64 koruuninik akeqartinneqarnerat 2022-mi juulip aallaqqaataa aallarnerfigalugu atorunnaassasaq.
- Tamatuma kingunerisaanik umiatsiaararsortut aammalu angallatit (sinerissap qanittuani aalisartut) , Nuup umiarsualiviani Sikuki Nuuk Harbour A/S-imut tunisinerminni akitsuutaat akiliutigineqartarunnaassapput, nalunaarummi allassimavoq.
50 procentimik akikillisaaffigineqartut
Angallatit talinnganermut akiliutigisartagaat 50%-ingajammik appaaffiginerpoq, tassa ukiumut 19.874 koruuniniit ukiumut 10.000 koruuninut appartinneqarami.
Erik Jensenip akigitinneqartussat nutaat naammagisimaarpai, sinerissap qanittuani aalisartut tunisarisartagaat ikileriarsimammata aamma aalisartut aningaasaqarnikkut atugaat unammillernarnerulersimammata.
- Naalakkersuisuniit nuannaarutigaarput Sikuki pitsaasumik ajunngitsumillu oqaloqatigilluareernerata kingunerisaanik, Nuummi aalisarnermik piniarnermillu inuussutissarsiuteqartunut aaqqiissutissanik Naalakkersuisut kissaatigisaateqarnerat malillugu aaqqeeqatigiissinnaasimagatta. Aaqqiissutit, sinerissap qanittuani aalisartunut iluaqutaasussat Sikuki-p akiinik appaanerinik malitseqartumik, Erik Jensen oqarpoq.
Sineriammut qanittumi aalisartut akikillisaaffigineqartut, umiarsualivimmik atuisut allat akitsuutinik akiliuteqartalissapput.
Januaarip aallaqqaataaniit ilaasumut ataatsimut 10 koruunit
Matumani ilaatigut pineqarpoq umiarsuartigut takornariartumut ataatsimut 10 koruuninik akitsuusiisimaneq:
- Piffissaq umiarsuit sinersorlutik takornariartitsisartut angalaffissaat pilersaarutaareersut eqqarsaatigalugit, akinik atuutsitsilernermi ilaasunut aki atuutsinneqalissaaq, taannalu aatsaat 1. januaari 2023-mi atuutsinneqalissaaq, taamaalilluni suliffissuaqarfimmi piffissami angalatitsiviusumi tullermi atugassarititaalersussanut piareersarnissamut piffissaqartitsisoqassalluni, Namminersorlutik Oqartussat akigititassat nutaat pillugit saqqummiussaanni allassimavoq.
Aasamut umiarsuit sinersorlutik takornariartitsisartut aatsaat taamak amerlatigisut Kalaallit Nunaannut tikittussatut naatsorsuutigineqarnerat tunngavilersuutigalugu akigititassat atuutsinneqalerput:
- Tamatumal nassatarisaanik umiarsualivinni isumannaallisaanerup nutaamik aallunneqalertussaavoq. Taamaattumik akit nutaat atorlugit ilaatigut isumannaallisaanermi suliniutinut attuumassutilinnut, aammalu sullissinernut, suliat annerulernerinut naleqqussakkanut aningaasalersuinissat qulakkeerneqarnissaat siunertarineqarpoq, Naalakkersuisut allapput.
Umiarsuit sinersorlutik takornariartitsisartut aasamut akigititanut nutaanut ukununnga akiliuteqartalissapput:
- Ikaartarfimmik/gangway-imik attartornermut akiliisitsisoqartassaaq, 10 m ullormut 3.500 koruunit.
- Umiarsuarnut sinersorlutik takornariartitsisartut tikinneri tamaasa tikinnermut ataatsimut ISPS-imut piareersaanermut 2.000 koruuninik akiliisitsisoqartassaaq.
- Umiarsuit sinersorlutik takornariartitsisartut tikinnerini pinngitsoorani avataaniit pigaartoqarnissamut akiliisitsisoqartassaaq, akiligassiissutaasoq (faktura ingerlateqqinneqartussaq) 15 %-inik tapeqartinneqartoq malillugu.