Nuummi savilersortoqartoq: Politiit angut nakuusersimasutut pasivaat
Tallimanngornermi ullaakkut politiit Nuummi illoqarfiup immikkoortuani Nuussuarmi Sangoriami savilersorfiusumiissimapput. Pinerliffigineqartoq politiit paasissutissaataat naapertorlugit ajunngilaq.
Tallimanngornermi Nuummi savilersortoqarnera pillugu politiit ilisimatinneqarput.
- Angut ernguttoqarneranut atatillugu Sangoriami savimmik kapineqarsimasoq pillugu, ullaaq nalunaaqutaq 08.50 missaani peqqinnissaqarfimmit sianerfigineqarpugut, Kalaallit Nunaata Politiivini pigaartut pisortaat, Gedion Qvist, Sermitsiaq.AG-mut oqaluttuarpoq.
Tamatuma kingorna politiit ambulancinik ilaqarlutik sumiiffimmut ornigupput.
Pinerliffigineqartoq aanaartumik ikeqarpoq, Sanamullu ingerlanneqarpoq, kingornalu angut alla tigusarineqarpoq, suliamilu nakuusersimasutut pasineqarpoq, pigaartut pisortaat oqaluttuarpoq.
Pasineqartoq Sanami misissorneqartoq
Ulloqeqqaanerata missaani pasineqartoq uppernarsaatinik qulakkeerinniffigineqassammat Sanamut ingerlanneqarpoq. Angut tamatumunnga atatillugu qaqortunik atallaalerneqarsimavoq, misissuinermi uppernarsaatit iluaqutaasinnaasut akornuserneqannginnissaat imaluunniit annaaneqannginnissaat isumannaarniarlugit.
- Suliaq nakuusertoqarneranik suliatut aallartipparput aamma suli misissuiffigaarput, taamaammat maannakkorpiaq annerusumik oqaaseqarsinnaanngilanga, Gedion Qvist oqarpoq, pasineqartorlu tunngaviusumik inatsit naapertorlugu killisiorneqassanersoq aamma tigummigallarneqassanersoq oqaaseqarfigisinnaanngilaa.
Pinerliffigineqartoq politiit paasissutissaataat naapertorlugit inuunerminik navianartorsiunngilaq.
