Nuummi sarfaaruteqqittoq
Nuummi sumiiffiit ilaat pingasunngornerup ullaavani sarfaqanngillat. Ajornartorsiutaasut illoqarfimmi sumiiffiit ilaanni iluarsineqarsimapput, Nukissiorfinnit nalunaarutigineqarpoq.
Takuuk. Nukissiorfinniit Kalaallillu Nunaanni Politiiniit paasissutissartalerlugu nutarterneqarpoq.
Kalaallit Nunaanni Politiit pingasunngornerup ullaavani ilisimatitissutigaat, sarfaaruteqqittoqarnera pillugu paasiniaaleruttorlutik.
Pigaartut pisortaata Mads Lyngep Sermitsiaq.AG-mut oqaatigaa, illoqarfiup immikkoortortaani, Qinngorput, tamarmiusumi innaallagiaqarpasittoq, Nuummili sumiiffiit ilaat innaallagiaqaratik.
- Upalungaarsimasortavut suliaqaqqipput, neriuutigaarpullu piffissap sivikitsup iluani paasissutissinneqarumaarluta, Mads Lynge oqarpoq.
Sarfaqaqqilersoq
Nukissiorfiit naluaaqutaq arfineq-pingasup missaani Facebookikkut allapput, ingerlatseqatigiiffiup Nuup ilaani innaallagiaq ikeqqissimagaa:
- Nukissiorfiup teknikkikkut sulisuisa sarfaarunnerup peqqutaa misissorpaat sapinngisamillu atuisut sukkanerpaaq atorlugu sarfaqaleqqinnissaat sulissutigalugu, Nukissiorfiit allapput.
Politiit tusagassiorfinnut nalunaaruteqarlutik ilisimatitsissutigaat, Tusass-ip nalunaarutigisimagaa, sarfaaruttoqaraluartoq oqarasuaatit internetsimullu attaveaqaatit nalinginnaasumik ingerlasut.
Politiit ilanngullugu oqaatigaat, DMI-mit nalunaarutigineqarsimasoq Nuummi anorersuarnissaanik aarlerisaaruteqartoq, aamma aqquserngit quasattupilussuusut.
Politiit: Mianersoritsi
- Kalaallit Nunaanni Politiiniit Nuummi innuttaasunut kaammaatuutigaarput, aqqusinermi angalannerminni mianersoqqullugit. Kalaallit Nunaanni Politiinit naatsorsuutigineqarpoq, Kalaallit Nunaanni ingerlatsinermi ajornartorsiuteqaqqittoqalissangaluarpat, paasissutissanik allanik saqqummiussisoqassasoq.
Kommuneqarfik Sermersuumit nalunaarutigineqarsimavoq, atuarfiit meeqqeriviillu arlallit pingasunngornerup ullaavani sarfaqanngitsut.
- Atuarfiit paaqqinnittarfiillu sarfaqanngittut matoqqassapput, kisianni sulisui taakkaniissapput meeqqat taakungaanneqarnikut isumagineqarniassammata, kommuni nittartakkamigut allappoq.
Marlunngornermi illoqarfik tamarmi sarfaaruttoq
Ataasinngornermi unnulluinnartoq marlunngornerullu ulluata annersaani Nuuk sarfaqanngilaq, tamatumalu malitsigisaanik mobilit internetsimullu attaveqaatit atorneqarsinnaanatik.
Nukissiorfinnit oqaatigineqarpoq, anorersuarnerata kinguneranik Utoqqarmiut Kangerluarsunnguanni erngup nukinganik nukissiorfiup innaallagissamut aqqutaa ajortissimasoq.
Ajornartorsiutit kingunerannik innuttaasut tusintilikkaat marlunngornermi sarfaqanngillat, imeqaratik kiassarneqaratillu.
Nukissiorfiit marlunngornermi unnukkut nalunaarutigaat, Nuummi sumiiffiit amerlanersaat sarfaqaqqilerlutillu imeqaqqilersimasut, ullaaq-mannali sarfaaruteqqittoqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...