Nuummi qinersisartut: Qinersinissaq pingaaruteqarpoq
Tamat oqartussaaqataaneranni qinerseqataanissaq pingaaruteqarpoq. Nuummi innuttaasut ualimut qinersiartutut taama isumaqarput. Kina qinissanerlugu nalornisimanngitsut amerlapput.
Nunatta kitaani qinersiviit matunissaannut akunneq ataasiinnanngulerpoq. Innuttaasut Folketingimut qinersiartortut tamat oqartussaaneranni qinerseqataanissartik pingaartippaat.
Nammineernerulernissaq, sillimaniarnermut politikki nunatsinnilu ajornartorsiutit aaqqiivigineqarnissaannut suliniutit qineqqusaarnermi oqallisigineqarnerat qinersisartunit pingaartinneqarsimapput.
Qinerserngaartut marluk Sermitsiaq.AG-p oqaloqatigisai oqarput nunatsinni politikkikkut ineriartornerup sunneeqataaffiginissaa pingaaruteqartoq:
Winona Lynge, qinerserngaartoq:
- Siullermeerlunga qinersivunga, tamannalu uannut pingaaruteqartorujussuuvoq. Ulloq pingaartilluinnarpara, pissanganarluinnarporlu qinersisarnerup ilikkagaqarfiginera. Qinerseqataasinnaangama nuannaarpunga.
- Kina qinissanerlugu aalajangernissat ajornaassimava?
- Kina qinissanerlugu aalajangernissara ajornakusoorsimavoq, qineqqusaartunut malinnaasimanngikkaluarama. Piffissarli kingulleq atorlugu malinnaalerpunga, qinersinissannullu piffissaq kingulleq atorlugu aalajangerlunga. Qanoq qinersisarnersut pillugit paasisaqarnerunissannut ilaquttama ikiorpaannga. Qinerseqataanissara tamat oqartussaaqataaneranni pingaaruteqartoq isumaqarpunga, Winona Lynge oqarpoq.
Jan Kreutzmann, qinerserngaartoq:
- Nunatsinni politikkimi sunneeqataallungalu ikiuukkusukkama qinersiartorpunga. Kina qinissanerlugu ingerlaannaq nalusimanngilara, taassuma nunatsinnut suliniutigiumasai tusarnaarlugit isumaqatiginarami.
- Qineqqusaarnermi sammisat suut illit pingaartissimavigit?
- Sammisat tamarmik soqutiginarsimapput. Suna ataaseq pingaarnertut tassaallugu oqaatigiuminaatsippara, tamarmik pingaaruteqarput, Jan Kreutzmann oqarpoq.
Rosa Andersen aamma qinersiartortunut ilaavoq. Taanna isumaqarpoq politikerit innuttaasunut sullissimmata, sullissisussamik qinersinissaq pingaaruteqartoq:
Rosa Andersen, qinersisartoq:
- Tamatta akisussaaqataaffeqaratta, qinersinerit tamaasa qinersinissaq pingaartippara. Tamatta nunatsinni akileraartarlutalu inooqataagatta, qinersinissarput pingaaruteqarpoq. Ernera ernutaralu peqatigalugit ullumikkut qinersiartorpunga.
- Kina qinissanerlugu aalajangernissat ajornaassimava?
- Aap, ajornaatsunnguuvoq. Tassa sulissutigiumasaat nunarput pillugu, uanga pingaartitannut naleqqummata isumaqatigigakkillu qinerpakka. Qineqqusaarnermi sammisaq uannut pingaarneq tassaavoq nunatta nammineernerulernissaa, Rosa Andersen oqarpoq.
Peter Brix, qinersisartoq:
- Tamat oqartussaaqataaneranni pisussaaffiga naammassiniarlugu qinersiartorpunga.
- Kina qinissanerlugu aalajangernissat ajornakusoorsimava?
- Naamik ajornakusoorsimanngilaq. Qineqqusaartoq aalajangersimasoq takusinnaasimavara, eqqarsarlungalu suliani aallartereersimasani nangilluarsinnaagai. Taamaattumik taanna maanna qinerpara.
- Qineqqusaarnermi sammisat suut illit pingaartissimavigit?
- Kalaallit Nunaanni sammisat suut pingaartinneqarnerunersut eqqoriaruminaatsippara. Kisiannili uanga isumaqarpunga sillimaniarnermut politikki pingaaruteqartorujussuusoq. Sammineqarpallaannginnerali uggoraara. Ilami Kalaallit Nunaannut pingaaruteqarluinnarami, Peter Brix oqarpoq.
Innuttaasoq ataaseq ilisarisimasani qinersiartoqqusarlugit kaammattuuteqartarpoq:
Karl-Peter Herlufsen, qinersisartoq:
- Qinersiartortuaannarpunga, tamatigut qinerseqataanissaq pingaartikkakku. Aamma eqqarsaatigisarakku nunani allani ilai qinersisinnaanngillalluunniit, ilaallu qinersineri aqunneqartarlutik. Pingaaruteqartorujuuvoq tamat oqartussaanerani qinersinissaq, taamaattumik inuppassuit naapitakka oqarfigisarpakka qinersinissaat pingaaruteqartoq.
- Kina qinissanerlugu aalajangernissat ajornakusoorsimava?
- Folketingimut qinersinermi kingullermerniit maanna qinigara allaanerujussuuvoq. Kingullermik nalunarnikuuvoq kina qinissanerlugu, taamaammat taamani qinigara apersoqqaariarlugu qinernikuuara, taannalu iserpoq. Maannakkut misilikkusullugu, allannguerusullungalu, allamik qinersivunga. Pissanganarpoq, aamma Danmarkimi kina statsministeriussanersoq sunneeqataasinnaaguma, taamatut qinersivunga, Karl-Peter Herlufsen oqarpoq.
- Qineqqusaarnermi sammisat suut illit pingaartissimavigit?
- Assigiinngillat. Kisianni immaqa aamma nunatsinnut tunngasunik sunneeqataasinnaasumut qinersivunga, Karl-Peter Herlufsen oqarpoq
Qinersisartorlu ataaseq aalajangernissamut nalorningaatsiarsimavoq:
Dorthe-Katrine Olsen, qinersisartoq:
- Innuttaasuulluta sunneeqataaniassagatta Folketingimi, qinersinissaq pingaaruteqarpoq.
- Kina qinissanerlugu aalajangernissat ajornakusoorsimava?
- Qinigassamik toqqaanissamut ajornakusoortitsisimavunga, iluamik malinnaalluannginnama. Malinnaallatsiaraluarninnilu iluamik tusarnaarpiannginnakkit. Malinnaarpiarsimannginnama sammisaq sorleq pingaarnerusimanersoq oqaatigiuminaatsippara, Dorthe-Katrine Olsen oqarpoq.
Nunatta kitaani qinersiviit nal. 20.00 matussapput. Sermitsiaq.AG qinersinerup inernerisa paasinarsinissaata tungaanut malinnaassaaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...