Skip to main content

Nuummi qimarnguik: Naalakkersuisut anguniagaannut piareersarpugut

Nuummi qimarnguik ukioq manna arnanik 40-t meeqqanillu 32-t sinnerlugit amerlassusilinnik qimaaffigineqarsimavoq. Kommuneqarfik Sermersuumi katsorsaanermut pisortap Grethe Siegstadip Naalakkersuisut ilaqutariinni nakuusertoqartarneranik unitsitsiniarlutik anguniagaqarnerat nuannaarutigaa, isumaqarami nakuusertarneq inuiaqatigiinni tamani atugaasarmat tamanna pingaaruteqartoq.

Meeqqanut, Inuusuttunu Ilaqutariinnullu Naalakkersuisup aamma Naligiissitaanermut Naalakkersuisup Alliaq ikiortigalugu inuiaqatigiinni nakuusertarneq unitsikkusuppaat iliuusissatullu nutaamik pilersaarusiorsimallutik. Nuummi qimarnguiup katsorsaanermi najoqqutassat nutaat atuutsilerniarlugit suliarai, tassungalu atatillugu katsorsaasartunik pingasunik nakuusertarnermik pinaveersaartitseqataasrtussanik atorfinitsitsisimalluni.  

- Naalakkersuisut inuiaqatigiinni nakuusertoqartarneranik unitsitsiniarlutik periusissaliorsimanerat akuersaarparput. Katsorsaariaasitsinni najoqqutassaq nutaaq atuutsilerniarlugu suliaqarpugut. Katsorsaariaatsinut aappaagu allartinniakkatsinnut inatsisitigut atugassarititaasut misissuleruttorpavut, Grethe Siegstad Sermitsiaq.AG-mut oqarpoq.

Nuummi qimarnguik aggusti naammat qaammammusisoqarlunilu akileraarutinik utertoortoqarmat ilaqutariinnik sisamanik qimaaffigineqarsimavoq, Grethe Siegstad ilisimatitsivoq. Qimarnguik nutaapajaajuvoq, ilaqutariinnullu katsorsaanissamik neqerooruteqartarluni. 

Ajornartorsiut tamanit nassuerutigineqartariaqartoq

Naalakkersuisut susassaqartunik qanimut suleqateqarlutik nutaamik iliuusissatut pilersaarusiorniarput. Nuummi qimarnguimmut pingaaruteqarpoq, persuttaasarnerit assigiinngitsut misissuiffigineqarnissaat.

- Inuiaqatigiinni tamani persuttaasoqartarpoq. Ilaqutariinni atugarissaartuni ilaqutariinnilu atugarissaarpallaanngitsuni nakuusertoqartarpoq. Tamana pingaartumik coronap atuunnerani uppernarsisimavarput. Taamaammat pisuni ataasiakkaani qanoq persuttaasoqarsimanersoq paasiniassallugu pingaaruteqarpoq. Inuit ataasiakkaat persuttaasarneq pillugu oqaluuserinninnissaq nassueruteqarnissarlu aamma piffissap sivisuumik ingerlasinnaanerata paasinissaa ajornakusoortittarpaat, katsorsaasartut pisortaat nassuiaavoq.

Grethe Siegstadip aamma persuttaasarnermut tunngatillugu inatsisit pingaaruteqarnerat nassuiaatigaa. Tarnikkut persuttaasarneq 2017-imi meeqqat tapersersorneqarnissaannut inatsit atuutsinneqalermat persuttaanertut aatsaat isigineqalerpoq.

- Inatsit taanna malillugu tarnikkut persuttarneqarsimasunik maanna katsorsaasarpugut. Tarnikkut persuttagaaneq annernarnerullunilu ajoqusiinerusarpoq. Inuit aapparminnik tarnimikkut persuttagaasimasut imminnut annikitsuaqqamik naleqartittarput. Tarnikkut persuttagaanermi inuit ilaatigut aningaasaqarneq pillugu kusanaatsumik oqaluffigineqarlutillu sioorasaarneqartarput, Grethe Siegstad oqarpoq.

Meeqqat eqqaamallugit

Qimarnguimmit meeqqat angerlarsimaffimmi persuttaaffiusartumi inuusut eqqumaffigineqarnerunissaat kissaatigineqarpoq.

- Meeqqat ilaqutariinni persuttaaffiusartuniittut puigorneqapallattarput. Meeqqat nersualaarneqarneq sioorasaarneqarnerlu immikkoortikkuminaatsissinnaavaat. Angajoqqaat assersuutigalugu meeqqamik angajoqqaap aappaaniit arsaarinnissutigineqarnissaat sioorasaarutigisinnaavaat. Taamaammat katsorsaanitsinni meeqqat eqqumaffigineqarnerusarnissaat aallartinniarparput, katsorsaasartut pisortaat nassuiaavoq.

'Angajoqqaat meeqqanik sumiginnaasarnerat akiorniarlugu nuna tamakkerlugu iliuusissanut pilersaarut 2020-2030' Naalakkersuisut suliniumminni aallaavigivaat. Qanigisaasuni nakuusertarnerup pinaveersaartinneqarnissaanut Naalakkersuisut siunnerfilimmik siunissamullu ungasinnerusumut sulinissaannik taanna qulakkeerinnissaaq. 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER